Kreu i PD-së, Sali Berisha, gjatë fjalës së mbajtur në tubimin e sotëm deklaroi se Shqipëria tejkalon edhe Rusinë e Putinit apo Bjellorusinë e Llukashenkos, lidhur me faktin se ka tre drejtues të opozitës të arrestuar ose në procese politikike.
Sipas tij, me këpto veprime të drejtësisë qëllimi i vetëm është që kryetarin e opozitës ta caktojë kryeministri Edi Rama dhe sovraniteti i këtij vendit të shkelmohet nga mafia ndërkombëtare dhe mafia shqiptare.
“Ju qëndroni, nuk dorëzoheni, ju qëndroni të pamposhtur sepse nuk mund të pranoni një Shqipëri e cila sot është vendi i vetëm në Europë, tejkalon Rusinë e Putinit, tejkalon Bjellorusinë e Llukashenkos, me tre drejtuesit kryesorë të opozitës të arrestuar ose në procese politike. Kjo ndodh vetëm në Shqipëri dhe në asnjë vend tjetër. Por kjo çfarë është? Këto janë akte madhore, kazëm në themel të kushtetutës, vetëm e vetëm për ti caktuar opozitës kryetarin që do Edi Rama. Vetëm e vetëm që opozita të ketë një kukull peqe lepe dhe sovraniteti i këtij vendit të shkelmohet nga mafia ndërkombëtare dhe mafia shqiptare.” – tha Berisha.
Sipas liderit të opozitës, reformën në drejtësi e bëri mafia e miliarderit George Soros.
“Në këtë vend drejtësia mungon, është kryekëput në dorën e mafias. Në këtë vend qytetari i thjeshtë duhet të presë 14 vite për një vendi, dhe partnerët na thonë; ne mbështesim drejtësinë e re. Zotërinj ju mbështesni atëherë një Shqipëri pa drejtësi dhe kjo nuk është e ndershme. Pranoni gabimin që bëtë. Nuk ka qytetar në botë që të presë 14 vite për një vendim. Sepse e bëri mafia, mafia e Xhorxh Sorosit për të çelnikosur pushtetin e Edi Ramës. Ja ku i ke zamanët. Ja ku janë zamanët, këta mercenar pa ligj, pa nder pa moral, të cilët bëjnë gjithçka për të forcuar pushtetin e Edi Ramës. Ja ku është para jush dhe gjithë botës, vendimet e Gjykatës Kushtetuese hidhen në kosh të plehrave, kur narkodiktatorit nuk i shkojnë për shtat. Cila drejtësi na thoni pak, të nderuar miq, partnerë. A nuk është kjo tallje cinike me shqiptarët. Mos na thoni më, mos na thoni më. Mos mendoni se shqiptarët hanë bar, mos mendoni se janë budallenj. Jo more jo. Cilido që ka studiuar shëmbëlltyrën e tyre psikologjike deri sot, i nxjerr ata të kundërtën e asaj që mund të mendoni ju. Prandaj, çështja e drejtësisë është një çështje themelore për një shoqëri. Një shtet pa drejtësi, është shtet i vullnetit të një njeriu. Një shtet pa drejtësi, është i vetëgjyqësisë. Një shtet pa drejtësi, është shtet pa liri.”– tha Berisha.
