Policia e Tiranës ka sekuestruar një sasi lënde kanabisi si dhe disa “psilocybin”, ose siç njihen në shqip “kërpudha magjike” dhe si rezultat ka arrestuar poseduesin e tyre.
Autoritetet raportojnë se në kuadër të operacionit policor të koduar “Shrooms” është vënë në pranga shtetasi amerikan A. U., 32 vjeç, banues në Tiranë, i cili akuzohet për veprën penale “Prodhimi dhe shitja e narkotikëve”.
“Shërbimet e Policisë kanë lokalizuar në parkun e liqenit artificial të Tiranës, shtetasin e lartpërmendur, të cilit gjatë kontrollit fizik dhe të banesës, i gjetën dhe sekuestruan, në cilësinë e provës materiale, lëndë të dyshuar narkotike kanabis dhe psilocybin (kërpudha magjike).” – thuhet në njoftimin e bluve të kryeqytetit.
Materialet procedurale i kaluan Prokurorisë së Tiranës për veprime të mëtejshme.
