Ambasadori i Bashkimit Europian në Tiranë, Silvio Gonzato, ka zhvilluar këtë të mërkurë një takim me kreun e Kontrollit të Lartë të Shtetit, Arben Shehu.
Pas takimit, shefi i diplomacisë europiane në Tiranë ka reaguar përmes një postimi në rrjetet sociale, ku vlerëson punën e KLSH-së.
Gonzato shkruan se KLSH luan një rol vendimtar në luftën kundër korrupsionit dhe parandalimin e tij, në promovimin e qeverisjes së mirë dhe përdorimit efikas të fondeve publike, si dhe në mbështetjen e Kuvendit në mbikëqyrjen e tij buxhetore.
Ambasadori i BE-së bën me dije se kanl diskutuar me Arben Shehun për forcimin e këtij institucioni, si dhe e ka inkurajuar atë që të vazhdojë përpjekjet për përmirësimin e aksesit dhe përdorimit të raporteve të auditimit nga Parlamenti, OSHC-të dhe qytetarët.
Postimi i ambasadorit të BE, Silvio Gonzato:
“Kontrolli i Lartë Shtetit luan një rol vendimtar në luftën kundër korrupsionit dhe parandalimin e tij, në promovimin e qeverisjes së mirë dhe përdorimit efikas të fondeve publike, si dhe në mbështetjen e Kuvendit në mbikëqyrjen e tij buxhetore.
Gjatë takimit të sotëm me Kryetarin e tij, Arben Shehu, folëm për forcimin e rolit të KLSH-së. Gjithashtu e inkurajova atë që të vazhdojë përpjekjet për përmirësimin e aksesit dhe përdorimit të raporteve të auditimit nga Parlamenti, OSHC-të dhe qytetarët.”
