Kombëtarja shqiptare do të luajë mbrëmjen e nesërme, në orën 21:00 në Duseldorf kundër Spoanjës, ndeshjen e fundit në grupin B të kampionatit europian “Gjermani 2024”.
Ky duel është mjaft vendimtar për kuqezinjtë tanë në përcaktimin e fateve të këtij europiani, nëse do të arrijë të kalojë grupin apo jo.
Aktualisht kemi vetëm 1 pikë, pas barazimit me Kroacinë, teksa me fitoren kundër Spanjës kualifikimi do të ishte pothuajse i sigurt, ndërsa me barazim, matematika do na i lejonte ende kualifikimin, por shanset do të ishin shumë të pakta për të kaluar si një prej 4 ekipeve të vendeve të treta më të mira të grupeve. Humbja na eliminon direkt.
Në stadiumin “Merkur Spiel Arena” pritet të jenë rreth 30 mijë tifozë shqiptarë, teksa interesimi nga tifozët spanjollë duket i ulët, pasi “La Roja” u kualifikuan më tej si kokë e Grupit B pas fitore ndaj Italisë.
Trajneri Silvinho pritet të bëjë 3 ndryshime në formacion, nga ndeshja e fundit me Kroacinë.
Ka balotazh në qendrën e mbrojtjes mes Ardjan Ismajlit dhe Arlind Ajetit, me lojtarin e Empolit që duket më në avantazh për ta nisur nga minuta e parë. Ismajli ende nuk është aktivizuar në këtë europian, duke qëndruar në dy ndeshjet e kaluara në stol, pavarësisht se në ndeshjet kualifikuese ka qenë një titullar fiks.
Balotazhi tjetër është në krahun e djathtë të mbrojtjes mes Elseid Hysajt dhe Ivan Balliut. Me shumë mundësi, ky i fundit do ta nisë si titullar, nisur dhe nga fakti i eksperiencës, duke qenë se luan në kampionatin spanjoll me Rayo Vallecano. Hysaj do të ulet në stol pas dy ndeshjesh me disa gabime dhe duke qenë ndër lojtarët më të kritikuar nga tifozët.
Ndërkohë, ka balotazh edhe në sulm mes Rey Manajt dhe Armando Brojës. Sulmuesi i Chelsea luajti kundër Italisë, ndërsa me Kroacinë nuk u aktivizua për asnkë minutë. Këtë ndeshje, ai duket më i avantazhuar se Manaj për ta nisur si titullar. Vlen të theksohet fakti se pëpr këtë ndeshje mungon Mirlind Daku pas dënimit të marrë nga UEFA.
Sa i përket Arbër Hoxhës, sulmuesi i Dinamo Zagreb pritet ta nisë sërish nga stoli, edhe pse në dy ndeshjet e kaluara ka bërë mjaft mirë për aq minuta sa është aktivizuar. Ndoshta Silvinho e sheh si një “armë” shtesë për fraksionin e dytë të lojës anësorin e majtë.
Formacioni i mundshëm: Thomas Strakosha – Ivan Balliu, Ardian Ismajli, Berat Gjimshiti, Mario Mitaj – Ylber Ramadani, Kristjan Asllani, Jasir Asani, Qazim Laçi, Nedim Bajrami – Armando Broja.
Në krahun tjetër, trajneri i Spanjës Luis De La Fuente nuk do të rrezikojë 11-en e tij titullare duke zbritur në fushë me ekipin e stolit. Vetëm Aymeric Laporte do të luajë nga lojtarët që mposhtën Italinë, me Spanjën që zbret në fushë me 10 zëvendësues.
Zëvendësimi i liderit të mesfushës Rodri është automatik pas dy kartonëve të verdhë, të marrë prej tij në dy sfidat e para. Dy lojtarë që mund të startonin titullarë si qendërmbrojtësi Nacho dhe anësori Ayoze Perez janë gjithashtu të pasigurt për shkak të problemeve muskulare.
Martin Zubimendi është me siguri i pari në radhë për të zëvendësuar Rodrin, ndërsa lojtarë si Mikel Oyarzabal, Mikel Merino, Ferran Torres, Alejandro Grimaldo, por edhe 38-vjeçari Jesus Navas së bashku me portierin David Raya mund të jenë titullarë.
Formacioni i mundshëm: David Raya – Jesus Navas, Daniel Vivian, Aymeric Laporte, Alejandro Grimaldo – Mikel Merino, Martin Zubimendi, Baena – Ferran Torres, Joselu, Mikel Oyarzabal.
