Opozita dhe shoqëria civile do mbajnë sot sërish protestë para Bashkisë së Tiranës me qëllim dorëheqjen e kryebashkiakut Erion Veliaj.
Leja për zhvillimin e protestës është marrë si gjithmonë nga “Aleanca për Mbrojtjen e Teatrit”, për në orën 10:00. Policia u bën thirrje protestuesve të shmangin aktet e dhunës. Kujtojmë që më protestën e kaluar protestuesit kanë hedhur molotovë dhe kanë djegur gomat.
“Gjatë disa tubimeve të mëparshme, të zhvilluara nga Aleanca për Mbrojtjen e Teatrit, në sheshin para Bashkisë Tiranë, janë evidentuar raste të përsëritura të kundërshtimit të forcave të policisë, përdorimit dhe hedhjes së molotovëve e sendeve të tjera, në drejtim të Bashkisë Tiranë, duke rrezikuar seriozisht jetën dhe shëndetin e punonjësve të policisë dhe vetë pjesëmarrësve në tubime. Drejtoria Vendore e Policisë Tiranë respekton plotësisht të drejtën e qytetarëve për të organizuar dhe marrë pjesë në tubime paqësore. Policia u përsërit thirrjen organizatorëve, drejtuesve dhe pjesëmarrësve në tubime për të respektuar ligjin dhe për t’u distancuar nga çdo akt dhune”, njofton policia.
Për shkak të protestës do ketë devijim të përkohshëm të qarkullimit të automjeteve në bulevardin kryesor pranë Bashkisë së Tiranës.
