Presidenti i SHBA Joe Biden ka refuzuar të shpjegojë se si SHBA do të mbronte Tajvanin nga ushtria kineze në rast konflikti, por nuk do të “përjashtonte” vendosjen e trupave ushtarake në ishull.
Tajvani është mbështetur nga qeveritë e njëpasnjëshme në Uashington, edhe pasi SHBA-ja njohu zyrtarisht Republikën Popullore të Kinës në vitin 1979.
Uashingtoni vazhdoi t’i ofronte Tajvanit mundësi armatimi dhe tregtie. Ndryshe nga presidentët e mëparshëm amerikanë, Biden ka premtuar vazhdimisht se do të ndërhyjë ushtarakisht në rast se Kina përpiqet të marrë ishullin me forcë.
Në një intervistë me revistën TIME botuar të martën, Biden u pyet se si do të vepronte saktësisht ushtria amerikane në rast të një konflikti të armatosur në Tajvan.
“Kjo do të varet nga rrethanat,” u përgjigj presidenti. “Ne po vazhdojmë të furnizojmë kapacitetet… dhe ne kemi qenë në konsultim me aleatët tanë në rajon.”
Ai konfirmoi se nuk do “përjashtonte përdorimin e forcës ushtarake amerikane” në terren , por gjithashtu konsideroi opsione të tjera, të cilat ai nuk do t’i diskutonte publikisht.
Zyrtarë të lartë të ushtrisë dhe inteligjencës amerikane kanë pohuar se Pekini mund të jetë duke përgatitur ushtrinë e tij për të pushtuar Tajvanin.
