Klubi i Tiranës është në një moment të vështirë teksa paqartësitë për të ardhmen janë të mëdha si në aspektin menaxherial dhe atë sportiv.
Gjatë merkatos së verës të vitit 2023 nga klubi u larguan emra me peshë si Visar Bekaj, Zhozelin Behiratçe, Kristijan Toshevski dhe Albano Aleksi.
Ndërkohë në merkaton e dimrit 6 lojtarë të tjerë i dhanë lamtumirën bardhebluve, teksa spikasin emrat e Florent Hasanit dhe Ardit Hilës.
Gjatë janarit Tirana nuk kishte mundësinë të përforconte kontigjentin për shkak të merkatos së bllokuar problem ky i zgjidhur vetëm kohët e fundit.
Klubi më i titulluar në vend e mbylli këtë sezon në vendin e pestë, por skuadra ka çudira në statistika. Bardheblutë janë ekipi me sulmin më të mirë dhe prapavijën më të keqe që pas viteve 50-të.
Duke parë këtë situatë, te Tirana, janë të bindur që mbrojtja duhet të bëhet nga e para.
Bardheblutë me shumë mundësi do të “shkrijnë” të gjithë repartin e prapavijës. Paraqitja zhgënjyese e lojtarëve ka bërë që Halili të marrë një vendim të madh.
Përveç Përgjonit dhe Micit, të gjithë lojtarët e tjerë të prapavijës nuk do të jenë pjesë e sezonit të ri ose të paktën kanë shumë pak mundësi që të jenë.
Klubi ka bërë një analizë dhe ka arritur në konkluzion, se skuadra ka faj për paraqitjen, por në krye është reparti i mbrojtjes.
Nga njëra anë, Najdovski ka ikur nga ekipi, ndërsa edhe Lulaj është pa kontratë. Ndërkohë edhe kapitenit Erjon Hoxhallarit i është komunikuar fakti që nuk është në planet e klubit, por do të shihet se çfarë do të ndodhë.
