Dorjan Teliti, Zv.Kryetar i Këshillit Bashkiak të Tiranës është pyetur sot në emisionin Kafe Shqeto në SYRI TV se kur do të përfundojë Unaza e re e Tiranës, pasi janë dhënë disa afate herë pas here dhe së fundi, dha një edhe kryeministri Edi Rama: 31 dhjetor 2024.
Por për ekspertin e ekonomisë Teliti, Unaza e Tiranës nuk ka për të përfunduar as në vitin 2025.
“Pse të duket e pabesueshme?! Për cilin aks rrugor, qeveria ka një datë?! – ngriti pyetjen Teliti, duke vijuar: “Për Rrugën e Arbrit?! Për Qukës- Qafë Plloçën?! Për Rrugën e Kombit?! Për ato rrugët “e lëna rrugëve” që lame ne?! Kanë data këta?!
Këta kanë axhenda individuale, personale. Këta premtojnë që në zgjedhjet e ardhshme do të hapin ndonjë lot, do të hapin ndonjë segment 1-2 km, ndërkohë që Unaza është shumë më tepër se aq. Me këto ritme që po ecën puna, as për vitin 2025 nuk hapet Unaza e Tiranës! Po të shikosh ecurinë e punimeve, as për vitin 2025 nuk do të kemi Unazë të Tiranës, ndonëse ajo ka filluar që në vitin 2011, 2012 apo më herët akoma.
Kështu që datë nuk kemi. Këtu ka axhenda personale të drejtuesve të lartë të qeverisë, që siç bënë atë tenderin e Unazës për 22 milionë euro/ kilometri, e njëjta afërsisht me shifra ndoshta jo kaq të larta, përsëritet edhe për akset e tjera rrugore të Unazës së Tiranës. Datë nuk ka dhe Tirana do të vazhdojë të jetë në këtë kaos,” theksoi ai në SYRI TV.
