Pushteti qendror por edhe ai lokal e ka mendjen tek kullat kurse banorët e Durrësit janë lënë në “mëshirë të fatit”.
“Gropa, baltë dhe rrugë të shkatërruara”, kjo është pamja e shëmtuar që të ofron rruga “Eqerem Çabej” në lagjen nr.13 në Durrës, kurse banorët e kësaj zone ndihen të braktisur nga kryebashkiakia socialiste Emiriana Sako.
“Prej 23-24 vjetësh që jemi vendosur këtu nga ana e bashkisë, me përjashtim të dy dritave, s’është vënë asnjëherë dorë. Gjithmonë këtë rrugë e kemi mbajtur vetë, me shpenzimet tona. Pjesa më e madhe kanë dalë në pension dhe s’janë në gjendje më ta mirëmbajnë, se të rinjtë na kanë ikur.”, tha nje banor per mikrofonin e Euronews Albania.
Sipas banorëve, gjithçka është rezultat i mungesës së investimeve në infrastrukturën rrugore ndër vite nga ana e pushtetit vendor.
“Unë po bëj 20 vjet që banoj këtu dhe në 20 vjet kjo rrugë ka qenë gjithmonë në diskutim për t’u bërë. E bëjmë këtë vit, e bëjmë vitin tjetër dhe asnjëherë s’u bënë mbarë për ta bërë.”
“Po moj, na thonë që është në plan do bëhet, po se kur e kanë atë plan, 20 vjet nuk u del.”
“Unë jam nxënëse shkolle dhe çdo ditë, sidomos në dimër, bashkë me vëllain tim duhet me dalë nga porta, të hipi të hekurat që të dal këtej.”
“Çizmet duhet të rrinë këtu gjithë kohës, se vijnë që andej, heqin këpucët dhe veshin çizmet që të kalojnë rrugën.”
“Unë jam me invalid. Ku do ta nxjerr, ku të kaloj?”
Jo më shumë se 250 metra rrugë dhe vetëm 2 km larg nga vija bregdetare, kjo nuk është një panoramë e mirë as për turistët.
“Qeveria po e trumpeton me të madhe, që jemi kthyer në atraksion për turistët, ku do hyjnë turistët këtu.”
“Ka turistë po ku do vijnë të shkretët, këta më parë tremben, ku të vijnë? Të futen këtu nëpër këto pellgjet, të thonë çfarë janë këta? Edhe Afrika që thonë është Afrikë, besoj rrugët kështu nuk i kanë.”
