Ish-kryeministri, Sali Berisha, ka theksuar edhe njëherë rëndësinë e protestës së qytetarëve kundër vjedhjes dhe korrupsionit në Bashkinë e Tiranës.
Ai ka deklaruar mbrëmjen e sotme se qytetarët duhet të reagojnë me forcën më të madhe për të larguar Veliajn nga Bashkia pas vjedhjeve të bëra përmes kompanisë “5D”.
Berisha u shpreh ndër të tjera se rënia e bashkisë së kryeqytetit, rrëzimi i kryehajdutit të saj dhe nxjerrja e tij nga bashkia është fitorja vendimtare për krijimin e qeverisë teknike
Fjala e Berishës:
Qytetare dhe qytetarë. Të rinj, të reja, burra, gra. Kur ata arrestojnë luftëtarët tanë, secili nga ju duhet të reagojë me forcën më të madhe. Një për të gjithë, të gjithë për një, kjo është motoja jonë.
Këto ditë që kemi para ta bëjmë natën, ditë, për të përgatitur të premten që vjen, fitoren e madhe.
Rënia e bashkisë së kryeqytetit, rrëzimi i kryehajdutit të saj, nxjerrja e tij nga bashkia është fitorja vendimtare për krijimin e qeverisë teknike, zgjedhje të lira, rikthimin në pushtet të opozitës
Ndaj dhe të vazhdojmë ne me guxim të madh, me zemërim të madh, me vendosmëri të palëkundur, betejën tonë. Betejën e fitores. Betejën për dinjitetin. Betejën për qeverinë teknike. Betejën për zgjedhje të lira. Betejën për integrimin e Shqipërisë në Europë. Rroftë Shqipëria, rrofshi ju. Fitore, fitore, fitore!
