Duke komentuar vendimin e Gjykatës së Lartë për kërkesën e kryetarit të PD-së, Sali Berisha për të rrëzuar masën e sigurisë ‘arrest në shtëpi’, avokati Ylli Manjani e cilësoi si një vendim katastrofik.
Gjatë bisedës në ‘A Show’ me Adi Krastën në SYRI TV, Manjani tha se Gjykata e Lartë e tanishme është katastrofike, më e keqja në 30 vite.
‘Në detyrën e saj Gjykata e Lartë ka dështuar në mënyrën spektakolare. Është rasti Berisha që na e sjell këtë gjë, por unë dhe shumë kolegë të tjerë, themi se ajo ka dështuar në detyrat e saj kushtetuese.
Dy detyra kushtetuese ka; të garantojë që gjykatat e këtij vendi veprojnë brenda procesit ligjor dhe jo politik. Mbajtja në izolim për arsye politike, ose për arsye jo ligjore, duhej të ishte ulëritëse për gjykatën e lartë.
Dumani nuk flet si jurist dhe as si prokuror fatkeqësisht. Dumani kur flet si drejtues i SPAK ka ngarkesë më shumë se sa mban si profesionist. Fjala afërmendsh ka treguar një sinqeritet të jashtëzakonshëm të pakontrolluar dhe e falënderoj për këtë.
Ai lapsus apo gabim është diçka për tu përshëndetur, sepse i ka dhënë mundësinë publikut tani për të kuptuar se gjykatat nuk janë të lira dhe të pavarura, por diktohen.
Të kthehem edhe njëherë te Gjykata e Lartë.
Gjykata e Lartë është katastrofike, nga më katastrofiket që ne kemi pasur ndonjëherë në këto 30 vite.
Gjykata supreme e këtij vendi refuzon të bëjë detyrën. Nuk di se çfarë duhet të ndodhë tjetër’, tha ndër të tjera në SYRI TV, Ylli Manjani.
