Deputetja demokrate Ina Zhupa, anëtare e Komisionit Hetimor për PPP-të në Shëndetësi, në një konferencë për mediat pas dështimit të mbledhjes për shkak të mungesës së mazhorancës, tha se këto janë manovra për të zvarritur marrjen e informacionit.
Zhupa shton se mazhoranca në letrën e firmosur nga 5 deputetët e saj që nuk përfaqësojnë të gjithë mazhorancën, pretendohet se ekspertët janë me lart se deputetët dhe se sipas tyre duhet të jenë këta të fundit që të hartojnë planin e veprimit dhe jo kryetarja e komisionit, duke interpretuar sipas saj gabim ligjin.
Zhupa theksoi se e drejta për të hetuar është e atyre që e kërkojnë hetimin.
“Ju jeni dëshmitarë të disa manovra për të zvarritur marrjen e informacionit. E drejta e informacionit na garantohet nga Kushtetuta dhe nuk mundet që t’i mbivendoset asnjë ligj.
Sot në një përpjekje të dëshpëruar na kishin lënë një letër në tavoline, e firmosur nga 5 përfaqësues të mazhorancës, të cilët nuk përfaqësojnë as të gjithë mazhorancën vetë. Letër që praktikisht thoshte, ekspertët janë mbi deputetët dhe ligjin nuk e njohin sic është. Ligji thotë se kryetarja e Komisionit duhet të ketë një plan veprimi për të hetuar, gjë që e ka bërë kryetarja në mbledhjen e kaluar.
Do duhet të ekspertët e tyre të hartojnë një plan veprimi dhe ne të zbatojmë atë, por nuk është kjo e drejta. E drejta për të hetuar është e atyre që kërkojnë hetimin.
Mazhoranca mund të shtojë informacion, jemi të hapur për këtë, por kurrësesi që të mos lejojë që të mos dërgohen shkresat që kërkojmë ne për planin e veprimit.
Ne sot kemi firmosur të 7 kërkesat për informacion, ne rreth 40 institucione, që do jenë provat e para të një vjedhje të madhe prej 200 milion euro.”– tha Zhupa.
