Policia e Elbasanit ka goditur një rast të trafikimit të armëve nga Maqedonia e Veriut në Shqipëri dhe si rezultat është vënë në pranga një 33-vjeçar.
Në kuadër të operacionit policor të koduar “Border Crossing” raportohet se është vënë në pranga shtetasi Shaqir Çela, banues në Prrenjas, mbi të cilin rëndojnë akuzat për për veprat penale “Trafikimi i armëve dhe i municionit” dhe “Mbajtja pa leje dhe prodhimi i armëve, armëve shpërthyese dhe i municionit”.
“Gjatë operacionit, në fshatin Skroskë, u lokalizua shtetasi Sh. Ç., i cili kishte me vete, një armë zjarri kallashnikov dhe një armë gjahu. Nga hetimet e deritanishme dyshohet se ai i kishte trafikuar armët, nga Republika e Maqedonisë së Veriut në vendin tonë, nëpërmjet kufirit të gjelbër, me qëllim shitjen në Shqipëri.” – thuhet në njoftimin e autoriteteve policore.
Po ashtu, Policia bën me dije se në drejtimin e Prokurorisë, vijon puna për dokumentimin e plotë ligjor të veprimtarisë kriminale të shtetasit Shaqir Çela, si dhe për nxjerrjen përpara përgjegjësisë ligjore të shtetasve të tjerë që mund të jenë implikuar në këtë rast.
Materialet procedurale i kaluan Prokurorisë së Elbasanit për veprime të mëtejshme.
