Ish-kryeministri Sali Berisha, ka komentuar sërish mbrëmjen e sotme korrupsionin galopant në Bashkinë e Tiranës, ku janë përfshirë zyrtarët më të lartë dhe njerëzit më të afërt të kryebashkiakut socialist Erion Veliaj.
Gjatë fjalës së tij në tubimin qytetar, Berisha e ka cilësuar dosjen “5D” si një rrjet i tmerrshëm merimange, ku drejtorët e Bashkisë përfitonin miliona euro nga tenderat dhe ndërtonin hotele në Durrës e Dhërmi.
Berisha ngriti akuza se vetë kryebashkiaku Veliaj është askioner në një hotel në Durrës, bashkë me vëllain e kryeministrit, Olsi Rama. Sipas tij, këtë ja ka konfirmuar një mbështetës demokrat.
Berisha: Miqtë e mi, një rrjet drejtorësh që bënin tendera për ndërmarrjet e tyre, që i fitonte tenderat e bashkisë ndërmarrja e tyre, siç donin ata vetë, që ndërtonin hotele në Durrës dhe Dhërmi.
Një rrjet i tmerrshëm merimange, haptas padronë, pa dorashka, pa asgjë. Në sulm, në sulm, në sulm! Olsi Rama, hiq dorë nga 37 mijë metrat, se atje do e kesh popullin edhe ti. Hajdut!
Miqtë e mi një demokrat më thoshte se hoteli në Durrës është i Olsi Ramës dhe Erion Veliajt. I them unë: a ke ndonjë dokument për këtë punë? Dëgjojeni mençurinë e tij. Dokument nuk kam, por kam qenë aty dhe më kanë thënë punëtorët.
E dyta, po injorojnë edhe punëtorët. Po si ka mundësi, tha, cili është ai kryeministër në botë që mund t’i japë status strategjik një njeriu me një ndërmarrje me një punëtor, pa bilanc të ndërmarrjes së tij. Atëherë ai e bën për veten e vet.
Më tej Berisha u shpreh se Veliaj është i kapur me duart brenda dosjes ‘5D’, dhe duhej të ishte marrë në hetim apo të ishte me masë sigurie nga SPAK, gjë që s’po ndodh.
Berisha shton se drejtorët e Bashkisë duhet të akuzohen për grup të strukturuar kriminal.
Berisha: Së fundmi miqtë e mi, dy fjalë për ata të cilët më falni, po nuk dua t’i fyej, por bëjnë gjithë ditën Skap, Skap, Skap, e kuptoni vetë ju.
T’ju pyes njëherë një gjë o zotërinj që u ka ngelë Skapi në gojë: këta drejtorë a nuk janë një grup i organizuar kriminal? A nuk janë një organizatë e organizuar kriminale? A nuk kaluan paratë e drejtorive tuaj tek sipërmarrja 5 D? Janë apo nuk janë ju që thoni Skapi bëri punë.
Skapi nuk bëri punë, por bëri poshtërsi. Se Skapi duhet t’i akuzonte ata për grup të strukturuar kriminal. Po a e dini pse nuk i akuzon dot? Se do thonë ata që hoteli është i Lal Vjedhësit, nuk është i imi.
E dini se ç’do thonë se atë statusin e investitorit strategjik e pagoi Lal Vjedhësi me dy-tre kate te Edi Rama. Tani t’i pyesim pak skapistët e Edi Ramës: Po ju a keni marrë në atë hotel ndonjë dhomë a ndonjë gjysmë kati që silleni në këtë mënyrë?
Në mbyllje të fjalimit për të pranishmit, Berisha ka kujtuar protestën e thirrur nga Alenca Fitimtare, ditën e premte para Bashkisë së Tiranës, teksa i ka bërë thirrje Veliajt të japë dorëheqjen.
Berisha: Të fillojmë pra të premten, të mbështesim aleancën fitimtare. Këto që dëgjojmë, këto që shohim janë absolutisht kazus për të gjithë mosbindjen civile dhe betejën fitimtare tonë.
Erion o horr, mos u duk më në bashki. Jep dorëheqjen menjëherë.
Ish-kryeminsitri Sali Berisha, ka denoncuar edhe më herët hotelet me 5 yje të drejtorëve të Veliajt.
