Kryetari i Partisë Demokratike, Sali Berisha foli lidhur me ngjarjet e rënda kriminale, të ndodhura ditët e fundit në vend.
Në fjalën e mbajtur gjatë protestës poshtë banesës së tij, Berisha tha se vetëm në dy ditët e fundit janë katër atentate në vend, e kjo ka ndodhur sepse në krye të rendit është politikani më i lidhur me krimin.
Më tej, lideri i opozitës tha se gjatë qeverisjes së PD-së nuk u mbyll asnjë shkollë, ndërsa në vitet e fundit janë mbyllur të paktën 700 shkolla.
Berisha tha se mësuesit shqiptarë, nga mësuesit më të mirëpaguar, zbritën në mësuesit më të keqpaguar në rajon, me rroga 30 përqind më të ulëta se në Kosovë.
Kryetari i Partisë Demokratike deklaroi se, tani shkollat ndërtohen me 8 milionë euro dhe jo me 600 mijë euro, siç bëhej gjatë qeverisjes së PD-së.
Berisha e vuri theksin edhe tek renditja e PISA, ku Shqipëria ka pësuar rënie katastrofale në renditjen e universiteteve dhe shkollave.
Kryetari i Partisë Demokratike ka akuzuar kryeministrin Edi Rama se ka shpartalluar arsimin universitar. Berisha theksoi se fondet e kërkimeve shkencore janë inekzistente dhe qesharake.
