Nga Boldnews.al
Arrestimi i Drejtorit të ARRSH-së (Autoritetit Rrugor Shqiptar), për akuzën e “korrupsionit aktiv dhe pastrim të parave”, është ngjarja më e fundit që ka prekur oazin e pushtetit. Evis Berberi, një nga bashkëpunëtorët më të afërt të zëvendëskryeministres dhe Ministres së Infrastrukturës dhe Energjetikës Belinda Balluku, provoi prangat mbrëmjen e së mërkurës, bashkë me dy biznesmenë.
Dyshohet se “Berberi i Rilindjes” ka përfituar rreth 2.2 milionë euro tendera duke ia dhënë kompanisë ku më parë ishte pronar. Pra Berberi si drejtor, i jepte vetes tendera publikë… E bërë kjo në mënyrë kaq të trashë, ra në sytë e SPAK që nuk kishte nevojë të thellohej pasi faktet ishin ashiqare, madje të bëra publike prej kohësh nga media.
Megjithëse SPAK shënoi një statistikë më shumë, ajo që bie në sy është hetimi i përciptë në një institucion që ka bërë batërdinë me taksat qytetare. SPAK-istat nuk kanë parë sesi të gjithë tenderat janë dhënë me fondin limit. Sesi jashtë çdolloj llogarie, një kilometër rrugë nga ky institucion është prokuruar në një mesatare prej afër 20 milionë euro. Padyshim që as guxojnë të mendojnë se rrugët e florinjta të vendit kanë përfunduar në “bankat e arit” të kupolës drejtuese në qeverisje, pasi afera të tilla nuk nisin dhe mbyllen nga “xhepistët drejtore”. Berberi ishte një “dru i shtrembër” që prishi “stivën e drejtë” të qeverisë? Kështu do e shesin dhe si Rama ashtu edhe Bela kanë gati reagimin…
“Ata që kanë ngrënë dardha dhe kumbulla pas shpinës sime le të përballen me drejtësinë, përgjegjësia është individuale”-thotë Rama, sa herë ndonjë ish-ministër apo drejtor i rëndësishëm i pushtetit kapet në afera të frikshme korruptive. Belës i iku njeriu i saj më i besuar dhe ky është lajmi i vërtetë më shumë sesa arrestimi i një drejtori…
Brenda Rilindjes janë shumë “berberë” që rruajnë taksat e qytetarëve, duke i përkthyer aferat korruptive si burim që sjell pushtet. Në luftën brenda llojit në pushtet, rivaliteti është shumë i madh. Nuk është për ide, as për politikë apo ndikim, por vetëm se kush ka arritur të zhvasë më shumë dhe sa i zgjuar është që me milionat e korrupsionit të blejnë trashëgiminë politike, pasi Rama ta dorëzojë.
Më i gëzuari për arrestimin e fundit mund të jetë Erion Veliaj, i cili tre muaj më parë ishte gati në “depresion politik”, teksa prangat shkuan në zyrën e bashkisë, duke përfunduar në burg dy nga drejtorët e tij të rëndësishëm. Drejtori i Punëve Publike në Bashkinë e Tiranës, Taulant Tusha u arrestua për aferën e inceneratorit. Veliaj këtë lajm e mori teksa Rama kishte Asamblenë e PS-së ku kryebashkiaku nxiu dhe Bela ndrinte.
Rivaliteti me Belën, për të qenë ata pasuesit e Ramës ka kthyer edhe Prokurorinë Speciale në institucion që peshoren e drejtësisë e kthejnë në koqe kandari për politikën në pushtet duke anuar herë nga një palë e herë nga një tjetër. Drejtësia e re bëri “balancë pushtetesh”, duke prangosur një drejtor e bashkëpunëtor të Veliajt dhe një drejtor e bashkëpunëtor të Belës.
Teksa kjo shfaqje më shumë se e shëmtuar ndodh, “kryeberberi” ul me këmbë në tokë kandidatët për pasardhës të tij, duke u treguar se “briskun e rrojës” e ka shkuar në fytin e drejtësisë së re, e cila bën atë që i thotë Ai kryeberberi…
