Deputeti demokrat Edmond Spaho, deklaron se me mazhorancën janë zhvilluar negociata dhe janë në fazn për të kthyer normalitetin në parlament dhe për të plotësuar kërkesat e opozitës, për të rikthyer rendin kushtetues.
Duke folur për MCN, Spaho tha se prej pesë muajsh Partia Demokratike ka qenë në një aksion radikal në Kuvend, pasi iu mohuan të drejtat që njeh Kushtetuta, si marrja pjesë në komisionin për reformën zgjedhore, ngritja e komisioneve hetimore dhe mos shqyrtimi i kërkesës së opozitës për ndryshme në legjislacion.
Spaho deklaroi se më kryesorja e këtyre negociatave është njohja politike e opozitës që ka dalë nga vota e qytetarëve, jo vetëm nga mazhoranca por në radhë të parë nga komuniteti ndërkombëtar.
“Për shkak të negociatave sot jemi në fazën që do të kthehet normaliteti në Kuvend, përveç aspekteve teknike, më themelorja në këtë çështje është njohja politike e opozitës që ka dalë nga vota e qytetarëve, jo vetëm nga mazhoranca por në radhë të parë nga komuniteti ndërkombëtar. Kemi arritur në këtë pikë për shkak të 20 shkurtit, që tregoi se ka një masë të jashtëzakonshme njerëzish të pakënaqur me këtë qeverisje dhe gjendja është në prag të shpërthimit dhe bashkimi i Rithemelimit dhe grupi i deputetëve të drejtuar nga zoti Bardhi, jo vetëm në grupin parlamentar por edhe në parti.
Këto zhvillime zgjuan dhe komunitetin ndërkombëtar dhe sot jemi te fakti që do kthehemi në normalitet, do jemi pjesë e reformave të tjera nëpërmjet një komisioni të ngritur me dy palë me mazhorancën dhe opozitën dhe do fillojë puna me dy komisione hetimore, ato që u rrëzuan më të fundit në tetor 2023, për PPP-të në sistemin e shëndetësisë dhe sistemin e të dhënave. Çështja e reformës zgjedhore është shumë e rëndësishme dhe për mua nga të treja kërkesat, kjo çështje është më themelorja. Ne synuam të jemi pjesë e reformës. Drejtuesi ka të drejtën e vetos dhe po të mos kesh të drejtën e vetos je spektator. Vendos Alibeaj me Gjiknurin. Me kushtet e reja vendos Bylykbashi dhe Gjiknuri. Opozitë nuk do të thotë Rithemelim, ne kemi bërë një federatë.
Zoti Berisha është kryetari i Partisë Demokratike dhe është marrë edhe opinioni i tij për negociatat që kemi zhvilluar me mazhorancën, sikurse e kemi diskutuar dhe në grup parlamentar. Është konfirmuar disa herë se kryetari i partisë do të jetë kandidati për kryeministër edhe në zgjedhjet e 2025-ës. Nuk ka pasur asnjë kusht, ato tre komisione janë kërkuar nga shtatori 2021 deri në tetor 2023, siç e pohoi dhe kryeministri është e drejta e deputetëve të mbledhin firmat dhe të bëjnë kërkesat e tyre për komisionet hetimore. Sot kemi të drejtë që të kërkojmë ngritjen e çdo komisioni hetimor. Kapacitetet që kemi sot nuk na lejojnë që të ngrihen të gjithë komisionet. Këto dy janë komisionet e fundit që janë rrëzuar me votë nga PS dhe do të ringrihen. Sot zoti Bardhi ka shkuar në SPAK për të dorëzuar materiale të reja për çështjen McGonigal.” – tha Spaho.
