Ka nisur të mbahet online mbledhja e Asamblesë Kombëtare të Partisë Socialiste. Të pranishëm fizikisht në selinë rozë janë vetëm kryeministri Edi Rama, si dhe drejtuesit politik të PS-së në qarqe.
Edhe këtë herë, socialistët mbledhjen e mbajnë pa praninë e mediave, duke “kyçur” dyert. Në fokus të diskutimeve janë riorganizimi i partisë dhe diskutimet për zgjedhjet parlamentare të 2025-ës.
Burime për mediat bëjnë me dije se Rama ka ngritur shqetësimin për probleme në përbërjen e organizatave dhe regjistrin e partisë. Ai ka kërkuar minimalisht 4 anëtarë të rinj në çdo organizatë.
Kryesocialisti ka kërkuar dokumentim organizatë më organizatë prej çdo drejtuesi politik dhe pas këtij dokumentimi do të bëhen zgjedhjet në parti ne 15 mars-15 prill. Rama mësohet t’ju ketë thënë anëtarëve të punojne sikur në 15 mars të ishin zgjedhjet e përgjithshme.
Asambleja e PS-së u mblodh për herë të fundit më 11 Shkurt në një lokal në periferi të Tiranës, po ashtu me dyer të kyçura për mediat. Në atë mbledhje raportuan mbi performancën drejtuesit e qarqeve në Tiranë, Berat, Shkodër, Lezhë dhe Fier, ku u evidentuan problematikat dhe u lanë detyrat.
Në atë mbledhje Rama nuk i kurseu kritikat për Qarkun e Tiranës, më konkretisht për Kavajën dhe Rrogozhinën ku socialistët dhanë performancë jo të mirë në zgjedhjet e kaluara lokale, madje dhe duke e humbur Kavajën. Rama i kërkoi drejtuesit politik të qarkut Veliaj dhe deputetit Etjen Xhafa të përcaktojë emrat e anëtarëve të PS-së dhe drejtuesit socialistë që nuk kanë plotësuar objektivat në terren.
Gjithashtu, Rama shprehu rezerva edhe për performancën dhe angazhimet e ish-ministrave të tij, ku sipas kreut të qeverisë, pasi kanë lënë karriget kanë zbehur angazhimin e tyre. Si shembull ai mori Olta Xhaçkën, duke i thënë se nuk ka qene ekzistente në rrjetet sociale pasi u largua nga posti i ministres. “Që kur ka ikur nga qeveria, ka harrur të futet edhe në Facebook”, i tha Rama.
Asambleja e PS-së do të rimblidhet sërish më 16 mars në qytetin e Durrësit
