Arrestohet një nga personat e shpallur në kërkim në kuadër të operacionit të koduar “Metamorfoza’ në kuadër të të cilit në korrik 2023 u arrestua dhe biznesmeni strategjik Pëllumb Gjoka, shefi i policisë Oltion Bistri, dhe disa anëtarë të bandës së Bajreve.
Forcat RENEA në bashkëpunim me policinë e Shkodrës kanë rrethuar banesën ku fshihej në fshatin Kuç 32-vjeçari Shkëlzen Xhenje dhe e kanë vënë në pranga.
“32-vjeçari është shtetas me rrezikshmëri shumë të lartë shoqërore, për shkak të akuzave/dënimeve për një shumëllojshmëri veprash penale. Konkretisht, i akuzuar nga SPAK-u, në kuadër të operacionit “Metamorfoza”, për pjesëmarrje në grup të strukturuar kriminal, i shpallur në kërkim nga Policia e Shkodrës, pasi në vitin 2021, në bashkëpunim me 2 shtetas të tjerë, qëlloi me armë zjarri, shtetasit T. P. dhe K. M., si dhe i dënuar me 2 vjet burgim, nga Gjykata e Lezhës, për veprën penale “Futja ose mbajtja e sendeve të ndaluara në institucionin e ekzekutimit të vendimeve me burgim”, njoftoi policia.
I riu dyshohet edhe për të shtënat me armë zjarri ditën e djeshme në Shkodër.
