Policia e Shtetit ka dalë me një komunikatë zyrtare në lidhje me arrestimin në Dubai të 47-vjeçarit, Julian Meçaj, i njohur dhe si krahu i djathtë Plarent Dervishajt.
Sipas njoftimit të autoriteteve, ai është vënë në pranga në kuadër të operacionit policor të koduar “Tentativa”, i cili është kapur pas shkëmbimit të informacioneve mes Interpol Tirana me homologët në Emiratet e Bashkuara Arabe.
Julian Meçaj ishte shpallur në kërkim ndërkombëtar për atentatin e regjistruar më 1 nëntor 2019 tek mbikalimi i Shkozetit ndaj Aleksandër Lahos alias Pëllumb Muharremi, i njohur si “Rrumi i Shijakut” dhe ish-prokurorit Arjan Ndoj, ku mbeti viktimë shoferi i këtij të fundit Andi Maloku.
Ndaj tij rëndojnë akuzat për veprat penale “Vrasja e funksionarëve publike” mbetur në tentativë, “Vrasja”, “Prodhimi dhe mbajtja pa leje e armëve dhe municionit luftarak”, “Vjedhja” kryer në bashkëpunim, më shumë se një herë, “Grupi i strukturuar kriminal” dhe “Sigurimi i kushteve/mjeteve për të kryer vrasje”.
Atentati i mbikalimit të Shkozetit u zbardh pas zbërthimit të bisedave në aplikacionin “SKY”, ku si organizator u shpall në kërkim Plarent Dervishaj.
Ky i fundit kishte përplasje të vjetra me “Rrumin e Shijakut”, konflikti mes palëve dyshohet se u agravua pas atentatit që iu bë Dervishajt në Durrës në vitin 2019, kur makina me të cilën lëvizte u qëllua me armë zjarri. Askush nuk humbi jetën edhe pse sipas raportimeve, mbi 40 plumba u qëlluan drejt automjetit me të cilin lëvizte Dervishaj bashkë me Marsel Deçkën (kushëri i tij), Bashkim Haxhiajn dhe Julian Meçajn.
“Referuar bisedave të realizuara nga përdoruesit e ‘SKY’ midis datave 13 gusht 2019 dhe 23 shtator 2019, ndërmjet shtetasve Julian Meçaj dhe Amar Shkëmbi, del në pah sigurimi i kushteve dhe masat paraprake që janë marrë nga autorët për realizimin e vrasjes së Arian Ndojit dhe Pëllumb Muharremit (Aleksandër Lahos). Pasi për këtë qëllim, këta persona kanë shkarkuar në telefonat e tyre aplikacionin “SKY”, me qëllim për të mos u përgjuar dhe identifikuar”, – thuhet në dosje.
Policia njofton se Interpol Tirana vijon procedurat në bashkëpunim me Interpol Abu Dhabin, për ekstradimin e Julian Meçajt, drejt vendit tonë.
Njoftimi i Policisë
Finalizohet si rezultat i bashkëpunimit mes Interpol Tiranës dhe Interpol Abu Dhabi, operacioni policor i koduar “Tentativa”.
Pas shkëmbimit të informacioneve mes dy palëve, kapet në Dubai dhe arrestohet me qëllim ekstradimin në Shqipëri, një shtetas shqiptar i shpallur në kërkim ndërkombëtar për disa vepra të rënda penale.
Vijojnë procedurat për ekstradimin në Shqipëri, të 47-vjeçarit të akuzuar si pjesëtar i një grupi të strukturuar kriminal.
Interpol Tirana, në vijim të bashkëpunimit me homologët në Emiratet e Bashkuara Arabe, ka shkëmbyer informacion për një shtetas shqiptar në kërkim ndërkombëtar që fshihej në Dubai. Në bazë të informacioneve të shkëmbyera mes palëve, është organizuar operacioni policor i koduar “Tentativa”, si rezultat i të cilit është kapur në Dubai dhe është arrestuar me qëllim ekstradimin në Shqipëri, shtetasi shqiptar i shpallur në kërkim ndërkombëtar:
J. M., 47 vjeç.
Ky shtetas ishte shpallur në kërkim ndërkombëtar nga Interpol Tirana pasi Gjykata e Posaçme kundër Korrupsionit dhe Krimit të Organizuar i ka caktuar masën e sigurisë “Arrest në burg”, për veprat penale “Vrasja e funksionarëve publike” mbetur në tentativë, “Vrasja”, “Prodhimi dhe mbajtja pa leje e armëve dhe municionit luftarak”, “Vjedhja” kryer në bashkëpunim, më shumë se një herë, “Grupi i strukturuar kriminal” dhe “Sigurimi i kushteve/mjeteve për të kryer vrasje”.
Në vitin 2019, në autostradën Durrës-Tiranë, pranë mbikalimit të Shkozetit, shtetasi J. M., në bashkëpunim me shtetas të tjerë, ka qëlluar me armë zjarri në drejtim të automjetit me të cilin udhëtonin shtetasit A. N. (me detyrë prokuror i Prokurorisë së Rrethit Gjyqësor Durrës), A. L. dhe shtetasi A. M. Si pasojë e të shtënave ka humbur jetën shtetasi A. M. dhe dhe janë plagosur shtetasit A. N. dhe A. L.
Interpol Tirana vijon procedurat në bashkëpunim me Interpol Abu Dhabin, për ekstradimin e shtetasit J. M., drejt vendit tonë.
