Rreth 20 minuta zgjati seanca e sotme plenare, me socialistët që miratuan pa diskutim projektligjet në rendin e ditës, ndërsa opozita vijoi me aksionin për pengimin e zhvillimit normal të jetës parlamentare.
Deputetët socialistë dhe ata të grupit Basha mbërritën në ambientet e Kuvendit rreth 1 orë para nisjes së seancës plenare, ndoshta për të shmangur një ballafaqim me kolegët demokratë në hyrje të parlamentit. Aty pati më pas momente tensione mes punonjësve të gardës dhe ligjvënësve demokratë të përjashtuar (nga Sekretariati i Etikës me votat e PS). Flamur Noka hodhi miell mbi gardistët dhe Sekretarin e Përgjithshëm të Kuvendit, Genci Gjonçaj. Një veprim ky që sipas Nokës, simbolizon se garda është bërë palë me “narkoparlamentin” dhe “narkoregjimin”.
Deputet demokrat Dashnor Sula zgjodhi të shpaloste një tjetër simbolikë për të shprehur kundërshtinë ndaj ligjit të mazhorancës për riligjërimin e lojërave të fatit. Me stampime në veshjen e tij të kartëmonedhave dhe logo të kompanive të basteve, Dashnor Sula tha se me këtë projektligj synohet pastrimi i parave nga politikanët dhe grupet kriminale. Teksa kujtonte deklaratat e kryeministrit Rama që premtonte se “do i jepte fund marrëzisë” kur njoftonte ndalimin e lojërave të fatit, Sula tha për gazetarët në hyrje të Kuvendit se “sot nis dita e çmendurisë”.
Mbi 20 deputetë të opozitës nuk morën pjesë në mbledhjen e Kuvendit për shkak se ndaj tyre qëndron në fuqi masa ndëshkuese e përjashtimit nga punimet parlamentare, vendosur nga Sekretariati i Etikës me votat e mazhorancës.
Seanca
Seanca ishte thuajse një motamo a atyre të ndodhura gjatë javëve të fundit, me punonjësit e gardës që ishin me prezencë të shtuar në sallë.
Fjala e kryeparlamentares Lindita Nikolla, e cila njoftoi rendin e ditës u shoqërua me fishkëllimat e bilbilëve të deputetëve të opozitës dhe thirrjeve “hajdutë”, e të tjera kundër qeverisë. Zhurma e bilbilave u ndërpre vetëm për disa momente, gjatë një fjale të shkurtër që iu dha deputetit Edi Paloka për procedurë.
“Parlament normal harrojeni se kemi derisa të plotësohen të drejtat kushtetuese të opozitës”, theksoi ai nga foltorja e Kuvendit.
Fërshëllimat u rikthyen pasi Nikolla rimori fjalën dhe njoftoi kalimin në votim. Dy amendamente të grupit të Lulzim Bashës, i cili ishte prezent në Kuvend, u rrëzuan. Amendamentet parashikonin dhënien e një ndihme financiare për Kosovën për mbrojtjen dhe sigurinë. Projektligji për bastet sportive u tërhoq nga rendi i ditës me kërkesë të kreut të grupit parlamentar të PS-së Bledi Çuçi, ndërsa u miratuan nga mazhoranca projektligjet e tjera në rendin e ditës.
Përveç bilbilave, gjatë seancës, pati qëndrime të tjera simbolike protestuese nga deputetët e opozitës. Edi Paloka i vuri flakën rregullores së Kuvendit, ndërsa Dashnor Sula hodhi imitim të kartëmonedhave mbi deputetët e mazhorancës.
Kryeministri Edi Rama nuk ishte i pranishëm në parlament.
Pas seancës
Tensionet vijuan edhe pas seancës plenare.
Automjeti me të cilin po largohej ministri i Brendshëm Taulant Balla u godit me vezë, ashtu si edhe automjeti i Sekretarit të Kuvendit Genci Gjonçaj, më pas.
“Je tradhtar, je i pabesë, je i paburrë”, iu drejtua Flamur Noka – Lulzim Bashës, teksa ky i fundit doli nga ambientet e brendshme të Kuvendit.
Për gazetarët, deputetë të opozitës paralajmëruan përshkallëzim të aksionit opozitar në vijim.
Duke u ndaluar te protesta e radhës e opozitës, Noka tha se “20 shkurti do jetë një ditë e shënuar që do i japë një mesazh të madh bandës së pushtetit, narkoshtetit, regjimit të McGonigalit”. “20 shkurti do jetë një ditë kur qytetarët dhe populli i lirë opozitar i këtij vendi do ngrihet. Dhe kur ngrihet populli, nuk ka regjim, nuk ka narkoshtet, nuk ka McGonigal. Ne do ta mbajmë aksionin me çdo formë dhe çdo mënyrë. Pas 20 shkurtit do shihni një hap tjetër të opozitës edhe në raport me këtë narkoparlamentin, edhe në raport me narkoregjimin”, shtoi ai.
Socialistët dhe deputetët e grupit Basha preferuan të mos prononcohen për gazetarët.
Lulzim Basha mbajti më vonë një konferencë për media nga selia e partisë së tij, duke hedhur akuza si ndaj mazhorancës, ashtu edhe opozitës.
