Ishin 75.547 spektatorët prezentë në “San Siro” për të shijuar Inter-Juventus, siç treguan të dhënat zyrtare.
Impianti milanez ishte mbushur në kapacitetin e tij maksimal, por në fund arriti që të vendosë vetëm arkëtimin e dytë rekord të historisë, me 6.296.245 euro.
Mesa duket, Juventusi i dhuroi dje një kënaqësi të dyfishtë interistëve, pasi përveç se i lejoi lehtësisht tri pikët i mbushi edhe arkat dhe ky është një konfirmim, duke qenë se rekordin e arkëtimeve për zikaltrit e mban sërish një Inter-Juve.
Bëhet fjalë për atë të 6 tetorit 2019, kur fitimet kapën shifrën 6.6 milionë euro dhe prezent ishin 75 mijë e 923 spektatorë, ndonëse atë duel e fituan 2-1 bardhezinjtë e drejtuar në atë periudhë nga Sarri.
Ajo që kompleton podiumin e arkëtimeve për zikaltrit është Inter-Milan 1-0 e 5 shkurtit 2023, me 5.75 milionë euro (75.584 spektatorë).
