Të tjera detaje kanë dalë në dritë nga vrasja e 39-vjeçarit shqiptar në Itali, Bledar Dedja. Ai u gjet i vdekur me pantallona të ulura në pyll dhe fillimisht u raportua si grabitje, por ditën e sotme mediat vendase kanë ngritur dyshimet se mund të ketë qënë edhe një krim pasioni.
Dyshimet janë se Dedja bënte një jetë të dyfishtë pasi ai ishte i martuar. Raportohet se ai ishte përdorues i rregullt i aplikacioneve të njohjeve online, nga ku ishte njohur me një 30-vjeçare shqiptare, me të cilën krijoi një lidhje jashtëmartesore. Lidhjen me shqiptarin e ka pranuar edhe vetë 30-vjeçarja. Ajo u gjurmua nga hetuesit pasi këta të fundit analizuan telefonin e viktimës ku shqiptarja ishte në mesin e shumë personave që 39-vjeçari kishte komunikuar
Aktualisht nuk ka ende një autor për krimin e rëndë që ndodhi në Asolo të Treviso-s. Bledar Dedja u gjet i masakruar me thikë në pyjet e Paderno del Grappa dhe sipas autopsisë, ai është goditur më shumë se 20 herë me thikë, por shkaku i vdekjes u identifikua si një goditje e vetme fatale në shpinë, mjaft e fuqishme për të shkaktuar gjakderdhje të brendshme në gjoks./Trevisotoday.it
