A do thirret kryeministri Edi Rama në SPAK për tu pyetur për çështjen “McGonigal”? Pyetja iu drejtua kreut të SPAK Altin Dumani, i cili zhvilloi këtë të enjte një takim me studentë në universitetin e Shkodrës.
“Nuk mund të përgjigjem për pyetje të caktuara”, tha Dumani.
“Nuk ka rëndësi emri, por provat dhe nuk ka rendësi pushteti që ka dhe në një moment do ti duhet kujtdo që të vijë dhe të japë llogari në SPAK apo gjykatë. Ne jemi të ndjeshëm ndaj asaj që ndodh edhe në media apo kudo tjetër. Shumë media në muajin shkurt e vitit të kaluar dhe deri para 2,3 muajsh kemi marrë kritika pse nuk kemi regjistruar çështjen e ‘McGonigal’ dhe gjithë kritikët duhet të ndjehen të zhgënjyer se e kemi regjistruar që në janar të vitit 2022. Duhet të presim momentin kur të kemi diçka konkrete për ta publikuar”, shtoi.
I pyetur se në çfarë faze është hetimi për Ilir Metën, ai tha se vetëm se është “çështje nen hetim dhe nuk mund të jap të dhëna”.
