Zbardhen detaje nga komunikimi në grupin në “Whatsapp” të Komisionit të Reformës Zgjedhore.
Pasi është shkruar njoftimi për mbajtjen e mbledhjes së komisionit ditën e premte në orën 11:00, ka konfirmuar pjesëmarrjen Enkelejd Alibeaj, Kreshnik Çollaku dhe Eralda Tase, deputetë të grupuar krah Lulzim Bashës.
Kujtojmë se një ditë më parë, të mandatuarit e Edi Ramës dhe Lulzim Bashës në Komisionin e Reformës Zgjedhore gjetën gjuhën e përbashkët për të rinisur punën për ndryshimin e ligjit zgjedhor.
Dy bashkëkryetarët Damian Gjiknuri dhe Enkelejd Alibeaj hodhën firmat e tyre mbi letrën dërguar prezencës së OSBE në Tiranë ku i kërkohet ekspertë në fushën e zgjedhjeve për të asistuar punën e këtij komisioni.
Nga ana tjetër, PD kërkon zëvendësimin e Alibeajt si bashkëkryetar i komisionit, duke u shprehur se ai nuk përfaqëson Partinë Demokratike.
