Ish-deputeti demokrat Belind Këlliçi u shpreh këtë të hënë se kryebashkiaku i Tiranës Erion Veliaj është “pronari real” i inceneratorit të Tiranës.
Në një deklaratë nga selia blu, Këlliçi vlerësoi se inceneratori ‘fantazmë’ i Tiranës, sipas tij “afera e shekullit”, ka marrë 120 milionë euro nga paratë e taksapaguesve.
Ai solli në vëmendje reagimin e Veliajt pas arrestimit të Taulant Tushës, për të cilin tha se “e bëri kurban për të shpëtuar lëkurën e tij”.
Sipas Këlliçit, Veliajt iu dhuruan 1 milionë euro nga paratë e inceneratorit në zgjedhjet e 2019-ës.
“Pra siç e shihni të nderuar qytetarë, Erion Veliaj pretendon se është një nga 5 klientët e biznesit korruptiv të Inceneratorit të Tiranës. Por faktet tregojnë të kundërtën. Erion Veliaj është pronari real. Erion Veliaj është i vetmi që si pronar që jep urdhra se cila kullë duhet të paguajë për depozitimin e inerteve dhe cila jo. Kujtojmë këtu e-mailet për kompaninë Arlis Ndërtim, pronari i së cilës ka ndërtuar 7 kate pa leje përballë zyrës së kryebashkiakut. E-mailet për kullën pas Sahatit. E-mailet për Teatrin Kombëtar”, tha Këlliçi.
“Erion Veliaj është i vetmi që si pronar i janë dhuruar 1 milionë euro nga paratë e Inceneratorit të Tiranës, në zgjedhjet e vitit 2019. Erion Veliaj është i vetmi që si pronar, inceneratori i paguan një faturë 300.000 euro për të marë makina në favor të Policisë Bashkiake. Erion Veliaj është i vetmi që si pronar vendosi të gjithë strukturën e Bashkisë Tiranë në shërbim të biznesit të dherave, strukturë e cila përdori tre lloje policish, Policinë e Shtetit, Policinë Bashkiake dhe Policinë Private të Agron Malajt, për të persekutuar dhe gjobitur të gjithë ndërtuesit e Tiranës dhe jo vetëm. Të nderuar qytetarë, I vetmi përfitues në këtë mega aferë është kryebashkiaku Erion Veliaj”, shtoi ai.
Deklaratën e mbylli me një apel për Prokurorinë e Posaçme, që ka nën hetim çështjen.
“Kemi hyrë tashmë në vitin e katërt të hetimeve për këtë çështje, kemi depozituar pranë SPAK me qindra faqe dhe dokumenta, ndaj sërish sot i bëjmë thirrje SPAK të veprojë në mënyrë urgjente duke ndalur këtë vjedhje, duke anuluar këtë kontratë korruptive dhe të vendosë sa më parë përpara përgjegjësisë ligjore, pronarin e vërtetë të Inceneratorit të Tiranës, Erion Veliajn. Nga sot përgjegjës për çdo qindarkë abuzim me këtë kontratë, janë dhe prokurorët të cilët me mosveprimet e tyre, po e lejojnë këtë vjedhje flagrante të ndodhë”, tha ai.
