Një 19-vjeçar është arrestuar këtë të martë nga policia, pasi është kapur duke transportuar emigrantë në mënyrë të paligjshme.
Blutë bëjnë me dije se në pranga ka rënë shtetasi me iniciale O.E. Ndërkohë është arrestuar gjithashtu një 28-vjeçar pasi ak përplasur makinën që drejtonte 19-vjeçari dhe një automjet tjetër.
“Gjatë operacionit u arrestua në flagrancë autori i dyshuar i këtij rasti, shtetasi:
O.E., 19 vjeç, banues në Tiranë, për veprën penale “Ndihma për kalim të paligjshëm të kufirit”, pasi nga veprimet hetimore ka rezultuar se po transportonte drejt Shkodrës, kundrejt pagesës 300 euro për secilin, 6 emigrantë nga Irani, të cilin synonin të kalonin ilegalisht kufirin me Malin e Zi.
Gjithashtu, u vu në pranga shtetasi E. G., 28 vjeç, banues në Lushnjë, për veprën penale “Shkelja e rregullave të qarkullimit rrugor”, pasi në aksin rrugor “Durrës-Tiranë”, me automjetin që drejtonte, ka përplasur automjetin me të cilin shtetasi O. E. po transportonte emigrantët dhe një automjet tjetër. Për pasojë janë dëmtuar shtetasi O. E. dhe njëri nga emigrantët, të cilët janë jashtë rrezikut për jetën”,- njofton Policia.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Durrës, për veprime të mëtejshme.
