Me bashkëpunëtorët e ngushtë në qeli edhe me një rol vendimtar në nënshkrimin e kontratës koncesionare të inceneratorit të Tiranës, kryebashkiaku Erion Veliaj thotë se “e ka ndërgjegjen e pastër”.
Ky është qëndrimi që mbajti në një intervistë në emisionin “Real Story” në ABC News, këtë të enjte.
Ish-vartësit e tij të arrestuar për aferën i quajti njerëz me karakter. “Kur shikon që dy inxhinerë të bashkisë, sa dëgjojnë lajmin shkojnë vetë në komisariat, por kjo nuk ka të bëjë me sistemin, ka të bëjë me karakterin”, tha.
Ai kërkoi që të avancohet me projektin e kontratës koncesionare pavarësisht sekuestros ndaj kompanisë me pronarë Klodian Zoton e Mirel Mërtirin.
“Administratori shtetëror duhet të jetë gardiani i kontratës, duhet të vazhdojë me ndërtimin e inceneratorit edhe kur të jepet ky verdikt. Nuk është zgjidhje të mos bëjmë asnjë punë, të bëjmë punë, por me sa me pak probleme”, tha Veliaj, duke shmangur përgjegjësinë për aferën, ashtu siç bëri kryeministri Edi Rama gjatë një konference për gazetarët më herët gjatë ditës.
Veliaj këmbënguli se sot “Tirana është më e pastër” dhe se nuk është ai koka e aferës së inceneratorit, siç e cilëson opozita.
“Unë do të pres rezultatin që shpresoj se do të jetë i shpejtë, që nëse dikush vërtet nuk ka asnjë faj të mos ngatërrohen me kokat që organizuan gjithë këtë histori”, tha Veliaj, për të cilin vëllai i ish-ministrit të Mjedisit Lefter Koka, zbuloi se ishte mjaft i interesuar për ecurinë e koncesionit.
“Ju rren menja se ka ndonjëri tjetër përgjegjësi më shumë sesa Rama, ju mendoni se do të bëheshin inceneratoret pa Ramën? Mendoshit që u bëshin inceneratorët pa Veliajn”, tha Leonard Koka, vëllai i Lefter Kokës në një bisedë telefonike me gazetarin Çim Peka disa ditë më parë.
