Kryetari i PD-së, Sali Berisha është ndaluar në Kamëz këtë të enjte, në kuadër të takimeve me qytetarë lidhur me aksionin opozitar. Takimet pritet të pasohen me protesta të organizuara nga opozita, për të cilat kryedemokrati paralajmëroi se nuk do të jenë paqësore.
“Beteja nuk behet ditën e zgjedhjeve, beteja bëhet tani. Te ike ky (Edi Rama), të hape rrugën dhe shqiptarët të votojnë të lirë. Edi Rama është armik! Të luftojmë me të gjitha mjetet e mosbindjes civile”, tha Berisha, ndërsa më tej theksoi se “protestat e qeta ti harrojnë, s’është koha më”.
“Ne duhet të pranojmë sakrificën përndryshe Edi Rama me diktaturën e tij mbetet në pushtet derisa këtu të gjenden 700 apo 800 mije banorë dhe të tjerët të jenë larguar nga Shqipëria. Por kjo s’do ndodhë, ne do ta përmbysim atë”, u shpreh kryedemokrati.
Berisha denoncoi vjedhjen sipas tij të zgjedhjeve nga PS dhe Rama, projekte të dyshimta të qeverisë si Porti i ri i Durrësit, procedura tenderuese që sipas tij janë fituar në mënyrë klienteliste nga thjeshta e kreut të qeverisë, mohimi i të drejtave të opozitës, apo lidhjet e kryeministrit me krimin.
Kreu i PD u ndal dhe te propozimi i fundit i PS për ndryshimin e ligjit për komisionet hetimore. Kryedemokrati u shpreh se projektligji i ri pamundëson komisionet hetimore parlamentare.
Për Prokurorinë e Posaçme, u shpreh se është “konfiskuar” nga Rama.
