Apeli i Gjykatës së Posaçme vendosi këtë të premte të lërë në fuqi vendimin e shkallës së parë për masën e sigurisë ndaj Sali Berishës dhe sekuestron ndaj disa pasurive të Jamarbër Malltezit.
Kreu i PD-së Sali Berisha kërkoi përmes mbrojtësve ligjor në Apel shuarjen e masës së detyrim paraqitjes dhe ndalim për të lëvizur jashtë vendit. Masa u kërkua nga SPAK dhe u miratua nga gjyqtarja e GJKKO Irena Gjoka, në kudër të hetimeve parapake për procedimin penal që lidhet me privatizimin e ish-kompleksit sportiv “Partizani”. Sipas Berishës, masa është vendosur në kundërshtim me ligjin e Kushtetutën. Ai thotë se është anashkaluar Kuvendi në vendimmarrje.
Për të njëjtin proces penal, Malltezi iu drejtua gjykatës me kërkesë për heqjen e sekuestron nga disa prej pasurive të tij, kryesisht prona të patundshme dhe aksione në kompani.
Për të dyja rastet, SPAK kërkoi përjashtimin e gjyqtares së çështjes Iliriana Olldashi me argumentin e konfliktit të interesit. Ankimet janë shqyrtuar nga gjyqtarja tjetër e Apelit Liliana Muça, e cila rrëzoi kërkesën e SPAK.
Në këto kushte, seancat rinisën me gjyqtaren Iliriana Olldashi, e cila vendosi përfundimisht të rrëzojë si kërkesën e Berishës ashtu edhe atë të Malltezit.
Pas vendimit, avokati i Berishës Genc Gjokutaj tha për gazetarët se kërkesa e SPAK për përjashtimin e gjyqtares nuk ka asnjë lloj baze ligjore. Ai e interpretoi si presion, që sipas tij, SPAK i bën gjyqtares Olldashi për të mbuluar shkeljet që vetë akuza ka bërë.
Malltezi akuzohet nga SPAK për “korrupsion aktiv” dhe “pastrim parash”, ndërsa Berisha për veprën penale të “korrupsionit pasiv” në procedimin penal për privatizimin e kompleksit sportiv “Partizani”. Akuza që janë hedhur poshtë nga të dy, ndërsa i kanë cilësuar thellësisht politike. Në ligjërime të ndryshme publike, kryedemokrati Sali Berisha ka argumentuar pse sipas tij, nuk qëndrojnë akuzat e SPAK. Për strukturën hetimore ka deklaruar se ka vepruar me urdhër të kundërshtarit të tij politik, kryeministrit Edi Rama.
