Policia malazeze ka sekuestruar një sasi prej 18 kg e dyshuar lëndë narkotike kokainë në pikën e kalimit kufitar të Debela Brijeg, mëngjesin e sotëm. Matjen e saktë të lëndës narkotike do ta bëjë policia në Qendrën e Mjekësisë Ligjore.
Në hyrje të Malit të Zi, mjeti me targa franceze, i drejtuar nga një shqiptar, është veçuar për kontroll të detajuar pas procedurës së rregullt doganore të kontrollit të automjeteve dhe pasagjerëve.
“Një sasi e madhe droge është gjetur në një hapësirë të posaçme nën sediljen e shoferit dhe të pasagjerit, gjatë kontrollit të detajuar të veturës së pasagjerëve “BMW”, i cili është kryer nga doganierët dhe policia kufitare”, njofton dogana malazeze.
Shqiptari është arrestuar ndërsa malli i është dorëzuar efektivëve të Departamentit të Antidrogës në Drejtorinë e Policisë. Paketimet janë të së njëjtës madhësi, peshë dhe formë, të ngjitura me shirit.
