Qindra qytetarë janë mbledhur pasditen e sotme pranë Ministrisë së Arsimit për të protestuar pas rastit të rëndë të dhunimit të një 3-vjeçareje nga edukatorja e saj në një kopsht privat në kryeqytet.
Qytetarë të shumtë nisën tubimin e tyre para Ministrisë së Arsimit, ndërsa kanë vijuar më tej marshimin deri te Ministria e Brendshme, ku kanë bërë thirrje për dënimin maksimal të edukatores, Majlinda Dehima, e cila dhunoi dhe i theu këmbën një bogëlushe 3 vjeçare.
Kujtojmë se mbrëmjen e sotme edukatorja, Majlinda Dehima është arrestuar nga policia. Qytetarët me pankartat e tyre kërkojnë që kjo edukatore “katile” të bëhet shembull dhe të ndëshkohet ashpër.
Edukatorja Majlinda Dehima është vënë në pranga nga policia ditën e sotme, pas kërkesës së Prokurorisë së Tiranës. Nga pamjet filmike të siguruara nga emisioni investigativ “Stop” duket teksa ajo qëllon me vizore vajzën 3-vjeç në ambjentet e kopshtit “Stinët”, i cili u mbyll pasi ishte pa liçensë. Ndaj pronarit të këtij kopshti është hapur dhe një procedim penal.
