Pasi firmosi marrëveshjen aq shumë të kritikuar me Meloninë e cila kthen ‘Shqipërinë në kamp refugjatësh’, Edi Rama është kthyer në vendin tonë për të vijuar turin e takimeve me simpatizantët e Partisë Socialiste.
I “eksituar” nga shifrat e këtij viti, kreu i qeverisë pretendon që deri në vitin 2030, Shqipëria do të presë mbi 20 milion turistë çdo vit. Një shifër e pabesueshme që kapin vetëm vendet e zhvilluara europiane.
Por kjo është vetëm një “ëndërr” e Edi Ramës pasi sot Shqipëria po përjeton shpopullimin më alarmant ku të rinjtë madje edhe intelektualët po kërkojnë “shpëtimin” ta gjejnë përmes emigracionit.
Edi Rama: “Mund të arrijmë në 2030 shifrën e 20 milionë turistëve. Jemi në një nivel të ri. Nëse shohim të dhënat edhe të institucioneve ndërkombëtare edhe shifrat e buxhetit shikon që është hapur një portë e re, për Shqipërinë dhe për shqiptarët. Realisht jemi në një fazë që po mbledhim përditë e më shumë atë çka kemi mbjellë dhe kemi kultivuar me shumë përpjekje vite më parë. Na është dashur të nisemi nga pika shumë të ulëta në çdo aspekt. FMN thotë që Shqipëria ka një nga ekonomitë më rezistente të rajonit”.
- Shpopullimi alarmant, 700 mijë shtetas janë larguar nga Shqipëria
Që nga viti 2008 deri në 2020-n, janë rreth 700 mijë shtetas shqiptarë që kanë marrë leje qëndrimi në një nga shtetet e Bashkimit Europian. Shifrat janë bërë të ditura nga Eurostat, instituti europian i statistikave dhe janë përpunuar nga “Monitor”.
Numri më i lartë i lejeve të qëndrimit është dhënë në periudhën 2008-2009, me përkatësisht 97.3 mijë dhe 83.9 mijë, si rrjedhojë e emigracionit të lartë të fillim viteve 2000. Më pas fluksi erdhi në rënie, duke zbritur në rreth 30 mijë në vitin 2013. Pas kësaj periudhe, rigjallërimi i ciklit të emigracionit, që tregohet dhe nga shtimi i ndjeshëm i kërkesave për azil solli një tjetër rritje të lejeve të qëndrimit, që kulmoi në vitin 2019, me rreth 60.4 mijë të tilla.
Në krahasim me vendet e tjera të rajonit, Shqipëria mban rekordin për numrin e shtetasve të saj që kanë zgjedhur të jetojnë e punojnë në një shtet të Bashkimit Europian.
