Drejtori i Përgjithshëm i Policisë së Shtetit, Muhamet Rrumbullaku ka firmosur pezullimin nga detyra të tre efektivë të komisariatit të Policisë nr.1 në kryeqytet në lidhje me ngjarjen e rëndë të denoncuar një ditë më parë, ku edukatorja Majlinda Dehima, në kopshtin privat “Stinët” në zonën e Ali Demit, kishte dhunuar një 3-vjeçare duke i thyer këmbët.
Tre efektivët e pezulluar nga detyra janë:
- Komisar R. D., me detyrë zv/shef i Komisariatit të Policisë Nr. 1, Tiranë;
- Nënkomisar Y. Ç., me detyrë shef i Seksionit për Hetimin e Krimeve, në Komisariatin e Policisë Nr.1;
- Nënkomisar E. B., me detyrë specialist në Seksionin për Hetimin e Krimeve, në Komisariatin e Policisë Nr.1.
Bëhet me dije se ndaj tyre ka filluar hetimi disiplinor për shkelje të rëndë disiplinore, parashikuar nga neni 209 i Rregullores së Policisë së Shtetit “Shkelja e rëndë e atributeve/kompetencave të Policisë”.
Sipas njoftimit të autoriteteve, nga verifikimet paraprake të kryera nga Drejtoria e Standardeve Profesionale, ka rezultuar se strukturat hetimore kanë kryer veprime procedurale dhe materialet i kanë referuar në Prokurori për vlerësim brenda afatit që përcakton ligji, por është konstatuar se veprimet nuk janë kryer të plota pasi nuk ishte bërë këqyrja e pamjeve filmike të kamerave që ndodhen në ambientet e kopshtit.
Këqyrja e pamjeve filmike të regjistruara nga kamerat e kopshtit është bërë pas transmetimit të rastit, në emisionin investigativ “STOP”, dhe materialet shtesë janë dërguar në Prokurori ditën e djeshme.
Gjithashtu, raportoht se ka nisur procedimi në gjendje të lirë, pas konsultimit me prokurorin, për edukatoren Majlinda Dehima si e dyshuar për kryerjen e veprës penale “Keqtrajtimi i të miturve”.
