Vllaznia ka lënë pas barazimin zhgën jyes ndaj Erzenit, duke u fokusuar totalisht te ndeshja e radhës ndaj Partizanit, që do të luhet të hënën në orën 18:00 në stadiumin “Arena e Demave”.
Trajneri Qatip Osmani ka zhvilluar stërvitjen e djeshme në fushën “Reshit Rusi”, e cila është me bar sintetik dhe i përshtatet stadiumit të Partizanit. Koha me reshje të shumta shiu nuk ka ndikuar dhe Osmani është munduar të marrë më të mirën nga seanca e djeshme.
Mirëpo, në prag të takimit ndaj kryesuesve, problemet janë evidente, pasi dy prej lojtarëve më të rëndësishëm kanë probleme fizike. Bëhet fjalë për mesfushorin Esat Mala dhe sulmuesin Bekim Balaj, të cilët kanë shfaqur probleme pas ndeshjes me Erzenin.
Madje golashënuesi shkodran mësohet se ka bërë shumë sforco për të qenë i gatshëm ndaj Erzenit. Ndërsa Mala, për shkak të një përplasjeje në takimin e fundit, ka pësuar një dëmtim dhe nuk është stërvitur me grupin.
Megjithatë, që të dy titullarët mund të sakrifikojnë për të qenë të gatshëm kundër Partizanit. Kuqeblutë do të tentojnë të marrin një rezultat pozitiv në kryeqytet për të përmbysur edhe situatën e zymtë që ka kapluar ekipin.
Osmani ka shumë pak për të ndryshuar në formacion nga përballja e fundit me Erzenin. Me përjashtim të një rikthimi të mundshëm të Hakajt në të majtë të mbrojtjes, gjasat janë që pjesa tjetër e ekipit të jetë e njëjtë me atë që ishte kundër shijakasve.
Gjithmonë nëse nuk do të ketë ndonjë lajm të keq nga dyshja Mala-Balaj, mungesa e të cilëve mund të ishte shumë e madhe për Vllazninë në këtë përballje delikate në kryeqytet.
Stërvitja e së dielës do të jetë vendimtare, jo vetëm për përcaktimin e formacionit, por edhe për të konfirmuar gjendjen fizike të Malës dhe Balajt, që duhet të bëjnë një sforco për të qenë në fushë.
Mbrojtësi i majtë, Esin Hakaj, është stërvitur dje normalisht me grupin, por fakti që ka disa javë jashtë fushës, i jep pak shanse të jetë titullar të hënën ndaj Partizanit.
Megjithatë, trajneri Osmani po punon për përgatitjen e ekipit në aspektin taktik, duke iu përshtatur edhe kundërshtarit të radhës, që po kalon një formë të shkëlqyer.
Kujtojmë që në ndeshjen e fazës së parë në stadiumin “Loro Boriçi”, gjithashtu u mbyll me shifrat 0-0, me shkodranët që nuk përfituan nga një superiorit numerik, pasi Maget i Partizanit u ndëshkua me karton të kuq që në minutën e 14-të.
