Atalanta ka marrë fitoren e dytë radhazi në kampionat, teksa triumfoi pastër 0-3 ndaj Empolit, në takimin e Serie A të zhvilluar në Stadio Carlo Castellani (Empoli). Sfida u zhbllokua që në minutën e 5-të me Scamaccan.
Sulmuesi italian gjeti golin për bergamaskët, pas disa javësh “shterpësie”. Skuadra e Gasperinit insistoi dhe dyfishoi shifrat çerek ore para fundit të pjesës së parë me Koopmeiners. Rezultati mund të ishte edhe më i thellë, nëse portieri Berisha nuk do bënte disa pritje të rëndësishme.
Vendasit nga Castellani u zgjuan vetëm pasi pësuan 2 gola. Empoli pretendoi për penallti në minutën e 33-të pas një rrëzimi në zonë të një futbollisti, por për arbitrin Massimi L gjithçka ishte e rregullt, edhe pas verifikimit me VAR.
Në fillimin e pjesës së dytë, Scamacca me një goditje të bukur dërgoi shifrat në 0-3, duke e bërë kështu përmbysjen e kundërshtarëve një mision thuajse të pamundur.
Sa i takon lojtarëve shqiptarë, Berat Gjimshiti ishte titullar, ndërsa në krahun tjetër, Ismajli u aktivizua vetëm në pjesën e dytë. Atalanta renditet në vendin e katërt ndërsa Empoli e sheh veten në pozicionet e fundit.
