Një atentat me armë zjarri është regjistruar pasditen e kësaj të marte në Katalonja të Spanjës, ku shënjestër ka qenë një shqiptar, i cili ka mbetur i plagosur.
Ai është shfaqur në spitalin Vendrell, në Baix Penedès (Tarragona), ku i është nënshtruar me urgjencë ndërhyrjeve mjekësore. Mediat spanjolle raportojnë se shqiptari është plagosur me nga një plumb në secilën prej këmbëve, si dhe ka patur edhe një goditje në kokë.
Nuk bëhet e ditur gjendja shëndetësore e tij dhe as rrethanat se si ka ndodhur ngjarja apo identiti i të plagosurit.
Sipas raportimeve paraprake dyshohet se gjithçka duket se ka lidhje me trafikun e drogës. Autoritetet kanë nisur hetimet për zbardhjen e ngjarjes dhe identifikimin e autorit.
