Pas konferencës së jashtëzakonshme të ish-kryeministrit Sali Berisha mbrëmjen e djeshme nga selia e PD-së foli për mediat edhe deputeti i opozitës Oerd Bylykbashi.
Për të, masa e sigurisë e dhënë ndaj Sali Berishës me “Detyrim paraqitje” dhe arresti nga Jamarbër Malltezit janë akte qartazi me sfond politik.
Sipas tij SPAK ka shkelur në mënyrë flagrante Kushtetutën duke dërguar Policinë e Shtetit për zbatimin e një mase.
Ai shton se në Republikën e Shqipërisë është praktikë e konsoliduar që Prokuroria të marrë leje nga Kuvendi për caktimin e një mase ndaj një deputeti. SPAK këtë gjë nuk e bëri por dërgoi menjëherë policinë.
Oerd Bylykbashi: Pas akteve qartazi me një sfond politik nga një instrument gjoja i drejtësisë së re, i ngritur dhe i akuzuar që në fillimet kur është ndërtuar se po ndërtohet për t’u kapur dhe përdorur politikisht, pas asaj, në shkelje flagrante të Kushtetutës, SPAK dërgon Policinë e Shtetit, e cila në fakt është organ i zbatimit të ligjit dhe jo i urdhrave politikë të Edi Ramës, dërgon Policinë e Shtetit duke kërkuar ekzekutimin e një mase që kufizon lirinë e një deputeti të republikës, zotit Sali Berisha, deputet i Parlamentit të Shqipërisë, kryetar i PD.
Kufizon lirinë e tij në kundërshtim me Kushtetutën. Tashmë është praktikë e konsoliduar e parlamentit të Shqipërisë se prokuroria duhet të kërkojë leje nga Kuvendi, i cili duhet të japë autorizimin jo vetëm për arrestin, por dhe çdo lloj mase tjetër kufizimi të lirisë të çdo shtetasi shqiptar, që është deputet.
