Marrëdhëniet jo të mira mes kryeministrit të Shqipërisë dhe atij të Kosovës vijojnë, ndërsa përplasja e fundit lidhet me një deklaratë të Edi Ramës disa ditë më parë. “Veriu i Kosovës është tokë e askujt”. Ky ishte komenti i kryeministrit Edi Rama në një intervistë për një media të huaj disa ditë më parë, që u kritikua gjegjësisht. Megjithatë, deklaratën e mbrojti edhe në seancën e fundit parlamentare teksa u rrek të bënte një shpjegim. “Unë e kategorizoj veriun e Kosovës me shprehjen angleze ‘non man’s land’. Pse nuk qenka kur aty lulëzojnë aktivitete kriminale? Kur nuk ka asnjë kontroll dhe asnjë mundësi të parashikosh se çfarë vjen nesër. Çfarë ishte Lazarati, no man’s land”, tha ai.
Këtë të hënë, komentit iu përgjigj kryeministri i Kosovës Albin Kurti duke u shpreh se veriu i Kosovës është toka e Kosovës.
“Veriu i Kosovës është tokë e Kosovës, ne kemi nevojë për më shumë siguri. Trupat e NATO-s të jenë në patrullime të përbashkëta me policinë e Kosovës, duke qenë se vija kufitare me Serbinë është shumë e gjatë. KFOR nuk është institucion i zbatimit të ligjit, këtë e bën policia e Kosovës. Integriteti territorial është i pacenueshëm, Veriu është tokë e Kosovës”, tha Kurti në një prononcim nga samiti i Tiranës për gazetarët, duke iu përgjigjur interesit të medias.
Kryeministri i Kosovës zbuloi po ashtu se ka kërkuar në samit nga kryeministrja serbe që të nënshkruhet marrëveshja për njohjen reciproke.
“Kemi marrëveshje me Serbinë, të 27 shkurtit që ka në qendër njohjen reciproke dhe që duhet të zbatohet. Edhe sot kam kërkuar nga kryeministrja serbe që ta nënshkruajë marrëveshjen bazike dhe aneksin e Ohrit. Unë jam që të zbatohen ato tani që presidenti Vuçiç është i zënë në Kinë në takime me superfuqitë lindore, por ajo sërish nuk ishte e interesuar. E falënderoj kancelarin Scholz për mbështetjen e vazhdueshme të Gjermanisë, që është aleati ynë shumë i rëndësishëm”, tha Kurti.
Më herët gjatë samitit, ai kërkoi sanksione nga BE ndaj Serbisë, ndërsa tha se Kosova ende po kërcënohet me “invazion” nga Serbia.
