Kualifikimi në Champions League për skuadrat e Milanos është shumë i rëndësishëm, si Milani, ashtu edhe Interi i kanë të varura lëvizjet e verës nga arritja e këtij objektivi.
Zikaltrit momentalisht mbajnë vendin e katërt dhe me një fitore në derbi do të bënin një hap përpara, ose ndryshe gara për vendin e tretë dhe të katërt do të kthehej në mjaft interesante, pasi Milani dhe Lazio janë shumë pranë, sikurse edhe Roma që nuk është shkëputur (Situata në renditje: Roma 59 pikë, Interi 55 pikë, Lazio 54 pikë dhe Milani 50 pikë).
“Tuttosport” në numrin e saj të sotshëm raporton se Interi po planifikon rinovimin e kontratës me trajnerin Luciano Spalleti.
Trajneri italian i përfundon kontrata në qershor të vitit 2019 dhe do të zgjatej edhe me një vit tjetër nëse zikaltrit do të sigurojnë pjesëmarrjen në Champions League.
Pikërisht Interi i sezonit të ri nis nga trajneri, por jo vetëm, pasi drejtuesit e klubit po punojnë edhe në merkato, teksa për momentin kanë siguruar shërbimet e sulmuesit Lautaro Martinez, i cili ka spikatur me Racing Club në Argjentinë, duke shënuar 10 gola në këtë sezon, një më shumë se kampionatin e shkuar. Duhet theksuar se 20-vjeçari këto gola i ka shënuar në 14 takime.
Mbrojtja është reparti tjetër ku pritet të ndërhyhet dhe dy lojtarët e tjerë të bllokuar janë Stefan De Vrij dhe Asamoah. Holandezi i Lazio-s është një dëshirë e hershme për skuadrën nga Milano, që gjatë gjithë verës e kërkoi.
Mbrojtësi qendror po kërkohet nga disa klube, ndërkohë që nga ana tjetër edhe vetë bardhekaltrit po mundohen të rinovojnë kontratën me të.
Një operacion shumë i vështirë në fakt për Igli Taren. Asamoah do ta mbyllë me Juventusin dhe tek Interi prej kohësh kanë shfaqur interesim për shërbimet e ganezit, të cilit i përfundon kontrata me ekipin nga Torino. Tre-vjeçare është kontrata e propozuar nga ekipi i Spalleti-t dhe zyrtarizimi i tij është çësthje kohe.
Asamoah është një lojtar që luan në disa pozicione dhe mund t’i bëjë shumë punë zikaltërve.
