Një 35-vjeçar është arrestuar këtë të enjte të Tiranë, pasi akuzohet se i ka marrë një shtetasi 2 mijë euro dhe i ka premtuar se do ti japë licencën e infermierit.
Rasti u denoncua një ditë më parë në emisionin investigativ “Stop”, ku 35-vjeçari, Igli Peti, kryeinfermier tek reparti ORL të Spitali i Traumës, i ka premtuar një qytetari ta pajisë me kartonin e licencës së infermierit, madje pa u futur fare në provim.
Për këtë, denoncuesi i ka dhënë 2 mijë Euro, por nuk mori as licencën e as nuk mundi ta kontaktojë më Iglin, pasi ky i fundit bëri bllok.
Peti është shoqëruar për veprime të mëtejshme proceduriale, pasi akuzohet për veprat penale “Mashtrimi”, “Ushtrimi i ndikimit të paligjshëm ndaj personave që ushtrojnë funksione publike” dhe “Shpërdorimi i detyrës”.
Njoftimi i policisë:
Në lidhje me një rast të transmetuar në emisionin investigativ “Stop”, që bën fjalë për një shtetas, i cili kishte përvetësuar shumën 2000 euro me anë të mashtrimit, duke i premtuar një shtetasi sigurimin e licencës për infermier, ju bëjmë me dije se:
Specialistët e Seksionit për Hetimin e Krimeve Ekonomike dhe Financiare, në bashkëpunim me Sektorin e Forcës së Posaçme Operacionale të DVP Tiranë, pas publikimit të pamjeve filmike, organizuan punën për kapjen dhe vënien përpara përgjegjësisë ligjore të shtetasit që shfaqet në video.
Në vijim të veprimeve, specialistët e Seksionit për Hetimin e Krimeve Ekonomike dhe Financiare të DVP Tiranë arrestuan shtetasin I. P., 35 vjeç, banues në Tiranë, për veprat penale “Mashtrimi”, “Ushtrimi i ndikimit të paligjshëm ndaj personave që ushtrojnë funksione publike” dhe “Shpërdorimi i detyrës”
