Replika këtë të enjte në Kuvend mes kreut të PD-së Sali Berisha dhe ministres për Marrëdhëniet me Parlamentin, Elisa Spiropali.
Nga foltorja e Kuvendit, Berisha tha se Spiropali vuan nga ajo që Frojdi e quan kompleksi i zilisë falike te vajzat. Ndërsa Spiropali tha se Berisha është “snajper me qira”.
“Do i them dy fjalë kësaj Elizës. Ke përdorur një term jo shumë të fisshëm. Po unë nuk do merrem më këtë, ti kërkon të biesh në vulgaritet, por unë nuk bie. Unë jam mjek dhe Zigmund Frojd ka gjetur se zhvillimi i njerëzve kalon në pesë faza. Faza e tretë është stadi falik. Shumica e kalojnë si një stad të pranuar. Disa mbeten aty dhe disa kanë kompleksin e Edipit. Ky kompleksi i stadit të tretë u ndodh edhe vajzave. Problemi është se Frojdi e quan këtë, zilia falike te vajzat”, tha Berisha.
Pas tij, fjalën e mori për replikë Spiropali e cila u shpreh: “Kush të mori me qira sot? Kanë filluar të marrin me qira tani. Të hedhin edhe ndonjë kocë këtej e andej gardhit për tu marrë me njërin dhe tjetrin. Ta kuptoj moshën dhe hallin. Është e paimagjinueshme që një gjysh që duhet të ishte mbyllur me turp sot, del në foltore dhe përmend problemet e tij të rënda. Me që fole për të varfrit e Shqipërisë, ti që paguhesh nga pasanikët më të mëdhenj të Shqipërisë, ti që sulmon ata që nuk të japin favore, unë për ty kam vetëm dy fjalë: më vjen keq për katandisjen tënde. Ke qenë kryeministër dhe nga kryeministër snajperist, je kthyer në një snajper me qira. Ata që të përdorin, do të të lënë ashtu siç je i zhveshur nga çdo moral. Ke humbur Sali. E di që të ka mbetur në fyt kocka e Shkodrës”.
