Nesër pritet të zhvillohet mbledhja tjetër e opozitës mes grupimeve të Gazment Bardhit dhe Sali Berishës. Kësisoj, pak orë para kësaj tryeze të përbashkët, deputeti Luan Baçi ka pasur një thirrje për kolegët e tij që vijojnë të jenë krah Lulzim Bashës.
“Ai grup që ekziston sipas Bashës, është punë e Bashës, unë shpresoj që shumë nga ata deputetë të reflektojnë dhe të shkojnë aty ku është shumica dërrmuese dhe të realizojnë kërkesën e demokratëve për të qenë të gjithë deputetët bashkë. Nuk dua të merrem me komedinë Basha, deri dje kërkonte të mbrohej me numrin e deputetëve tashmë që ky numër i ka rënë në mënyrë drastike, tani thotë se nuk na intereson numri. Unë do doja që nesër të jenë shumë deputetë të pranishëm”, tha Baçi në A2.
Duke u ndalur te lufta brenda partisë, ai vuri theksin se ky grup Berisha-Bardhi nuk ka ndërmend për të krijuar një grup të ri parlamentar, me një emër të ri. Kjo pasi sipas tij, ato janë Partia Demokratike e vërtetë.
“S’ka rëndësi për emër tjetër, PD ka një grup parlamentar, mund të jenë më shumë ose pak nesër. Njoftimi për mbledhjet e deputetëve është për të gjithë deputetët e 25 prillit, s’ka vend për grup parlamentar tjetër”, përfundoi Baçi.
