Në Kukës do të zhvillohen në 24 shtator zgjedhjet e reja lokale pas atyre të 14 Majit, për të zgjedhur pasuesin e Safet Gjicit (nën masën e arrestit me burg për akuzën e korrupsionit pasiv), i cili la detyrën pas skandalit seksual.
Por, para tyre, një tjetër proces zgjedhor do të zhvillohet në një nga dy partitë kryesore. PD njoftoi këtë të mërkurë se në fundjavë do të mbahen primaret për të zgjedhur kandidatin e kësaj force politike për Bashkinë e Kukësit.
Kryesia e Partisë Demokratike vendosi këtë të mërkurë që ky proces të realizohet të dielën e më 27 gushtit, ndërsa demokratët do të votojnë të preferuarin e tyre ndër 6 kandidatura: Ardian Elezi, Arif Rexhmati, Haxhi Vata, Gëzim Shehu, Uran Cengu dhe Ylber Zeneli.
Më herët gjatë ditës, Admir Sinamati, i cili ishte kandidati i koalicionit opozitar “Bashkë Fitojmë” më 14 Maj, njoftoi se nuk do të ishte pjesë e primareve.
“…I gjendur në këto kushte kur tashmë edhe pala kundërshtare ka hedh “në ring” një kandidat që ndryshon shumë nga ai i pari, kur situata aktuale është tejet më pozitive dhe favorizuese për opozitën e veçanërisht në Kukës, kur për fat të mirë edhe nga radhët e demokratëve tashmë kemi një numër të madh kandidatësh optimistë për pëfshirje në kandidim dhe besimin në fitore, kur një realitet i ri politik po don me marrë formë( bashkim lokal me poseduesit e vulës së PD), disa arsye të tjera personale si dhe për shkak të botkuptimit tim politik, unë jam i bindur se opozita në Kukës dhe PD nuk do të ndjejë aspak moskandidimin tim”, shkroi ai në një sqarim në rrjetet sociale.
Zyra e shtypit pranë PD konfirmoi se dega ka sjellë 10 propozime të cilat janë kontaktuar nga Sekretariati Organizativ dhe janë ftuar të plotësojnë dokumentacionin e kandididimit për Primaret. Deri sot, në afatin e fundit për pranimin e dokumentacionit kanë plotësuar formularët 6 kandidatë nga te cilët 5 janë propozuar nga dega dhe një është vetëpropozim, thuhet më tej në njoftimin e selisë blu.
Nga kampi socialist ndërkohë, nuk ka ende një konfirmim të kandidatit për zgjedhjet e reja në Kukës. Megjithatë, në media është raportuar gjegjësisht se kandidatura më e mundshme është ajo e Albert Halilajt, i cili prej 19 Korrikut të këtij viti mban postin e prefektit në Qarkun Kukës.
