Një postim i kryeministrit të vendit Edi Rama në rrjetet e tij sociale ka tërhequr vëmendjen e mediave italiane.
Një ditë më parë, Rama krahasoi fluksin e shqiptarëve që emigronin drejt Italisë në vitin 1991 me turistët italiane që tashmë vijnë për pushime në vendin tonë.
Rama publikoi një foto të anijes “Vlora” e cila në gusht të 1991 u nis me rreth 20 mijë shqiptarë që arratiseshin nga varfëria duke e krahësuar atë me fluksin e italianëve që sot mbushin tragetet për të pushuar në Shqipëri. “…dhe prit, prit se nuk keni parë asgjë akoma” – ishte komenti i Ramës që shoqëronte foton.
Megjithatë mediat italiane shkruajnë se kjo është një “shuplakë” e kryeministrit Rama për turistët italianë.
“Kryeministri shqiptar Edi Rama i gëzohet numrit të turistëve italianë në Shqipëri dhe në rrjetet sociale publikon një fotomontazh që ngjall diskutime”, shkroi Il Giornale.
“Ironia e kryeministrit shqiptar u shkaktua pas një sërë artikujsh, të cilët nxirrnin në pah se si në fakt është rritur numri i turistëve italiane në vendin fqinj ballkanik”, vijon e përditshmja italiane.
Corriere della Sera shkruan se Rama ironizon eksodin e 1991-shit”.
“Bumi i turistëve italianë në Shqipëri, që ikin në vendin e bukur nga çmimet të konsideruara shumë të larta është pëlqyer aq shumë nga qeveria e Tiranës, sa që kryeministri shqiptar Edi Rama kujton përmes rrjeteve sociale sesi kohët kanë ndryshuar – dhe rrjedha është përmbysur – që nga vitet 1990 e deri më sot. Megjithatë, posti i kryeministrit shqiptar nuk është mirëpritur pozitivisht nga të gjithë. Ka nga ata që, që për shembull, kujtojnë se emigracioni është një fenomen që ka shkaktuar – dhe shkakton edhe sot – mijëra vdekje në vit. Një fat që në të kaluarën e kanë pasur edhe vetë shqiptarët” – shkruan“Corriere Della Sera”.
Edhe “La Repubblica” e sheh të pavend krahasimin e turistëve me emigrantët. “Më 8 gusht 1991, rreth 18 mijë shqiptarë u strehuan në Itali me shpresën për të gjetur një të ardhme më të mirë atje, ndërsa në vitin 2023 italianët u shpëtuan çmimeve të larta duke kaluar pushimet në Shqipëri. E nëse ende flasim për eksodet, arsyet padyshim janë të ndryshme, por ka nga ata që e shohin të arsyeshme t’i lidhin ngjarjet përmes një kolazhi fotografik dhe më pas ta publikojnë në një rrjet sociale” – shkruan “La Repubblica”.
