Tre persona janë arrestuar nga policia e Tiranës, pasi akuzohen se tentuan të përfitonin një shumë parash nëpërmjet mashtrimit nga një biznesmen, duke u prezantuar si zyrtarë të lartë të institucioneve.
Në kërkim është shpallur një 40-vjeçar, i dyshuar si organizator i kësaj skeme mashtrimi.
Këtë të Premte, policia njoftoi se u bë arrestimi për veprën penale “Mashtrimi”, i shtetasve Afrim Radici, 34 vjeç, banues në Librazhd, Gëzim Çelanji, 41 vjeç, banues në Skrapar, dhe Qazim Vata, 22 vjeç, banues në Kukës.
Sipas hetimeve, ata kanë tentuar të mashtrojnë një biznesmen, për të përfituar shumën 35 000 euro, duke u prezantuar si zyrtarë të lartë të institucioneve, me emra të ndryshëm.
Në vijim të veprimeve u shpall në kërkim Florian Gjergji, 40 vjeç, i dyshuar si organizator i kësaj skeme mashtrimi. Gjergji është shpallur në kërkim për mashtrim edhe disa muaj më parë për një histori të ngjashme.
Në cilësinë e provës materiale u sekuestruan 2 automjete dhe 5 aparate celulare, që u përkasin autorëve të dyshuar.
