Policia e Vlorës ka goditur një grup të armatosur kriminal që shpërndante lëndë narkotike në plazhin e Gjipesë.
Në pranga janë vënë katër shtetas, më konkretisht: Erlind Gjini, 37 vjec, banues në Fier, Mariglen Dhiogjini, 41 vjec, banues në Vuno, Geri Beka, 28 vjec, banues në Tiranë dhe Mikela Zenunaj, 21 vjeçe, banuese në Tiranë.
“Gjatë kontrollit të çadrave të fjetjes së shtetasve të mësipërm, shërbimet e Policisë gjetën dhe sekuestruan në cilësinë e provës materiale 1 armë zjarri gjysëm automatike me një krehër, 256 fishekë luftarakë, 3 kavanoza qelqi dhe 4 qese plastike me rreth 600 doza lëndë narkotike, 2 peshore elektronike, radio marrëse-dhënëse si të policisë, thikë, 2 aparate celular dhe një automjet të llojit fuoristradë të markës “Toyota”.” thuhet në njoftim,in e Policisë.
Sipas autoriteteve, të katër shtetasit e vënë në pranga, në bashkëpunim me njëri-tjetrin, kryenin aktivitetin kriminal të shpërndarjes së lëndëve narkotike tek pushuesit dhe turistët, që frekuentonin gjirin e Gjipesë.
Materialet procedurale u referuan në Prokurorinë pranë Gjykatës së Shkallës së Parë të Juridiksionit të Përgjithshëm Vlorë për veprat penale “Mbajtja pa leje dhe prodhimi i armëve, armëve shpërthyese dhe municionit”, “Prodhimi, mbajtja, blerja apo shitja pa leje e armëve të ftohta”, dhe “Prodhimi dhe shitja e lëndëve narkotike”.
