Një aksident tragjik ka ndodhur pasditen e kësaj të marte në Greqi, me pasojë humbjen e jetëve të pesë personave, prej të cilëve të paktën 4 janë shqiptarë.
Sipas raportimeve të mediave greke, një makinë me targa shqiptare, në të cilën ndodheshin të 5 viktimat, u përplas kokë më kokë me një kamion pak para orës 18:00. Aksidenti tragjik ndodhi pranë qytetit verior të Edessa, në kilometrin e 87-të rrugës Follorinë-Selanik.
Si shkaqet ashtu sikurse rrethanat e këtij aksidenti momentalisht nuk janë të qarta. Megjithatë, dyshohet se shoferi i makinës “Benz” ku udhëtonin viktimat humbi kontrollin e mjetit dhe përfundoi në korsinë e gabuar, duke i dalë para kamionit.
Siç shihet edhe në pamje, përplasja ishte tepër e fortë dhe automjeti ku udhëtonin viktimat është shkatërruar thuajse tërësisht.
Të gjithë personat që ndodheshin në mjet gjetën vdekjen në vendin e ngjarjes. Për nxjerrjen e trupave të tyre u desh ndërhyrja e forcave zjarrfikëse, ndërsa policia në vendngjarje nisi hetimet për zbardhjen e rrethanave të këtij aksidenti.
I plagosur nga përplasja mbeti edhe shoferi i kamionit, shtetas grek, i cili u dërgua në spital në gjendje jo të rëndë.
Nga pamjet nga vendngjarja dallohet automjeti i shkatërruar që mban targë shqiptare.
Kameramani grek që ka filmuar pamjet, në një postim në rrjetet sociale shkruan se “sipas informacioneve të marra, të pesë personat janë me origjinë shqiptare të cilët punonin në fermat e zonës dhe ishin nisur për në (fshatin) Mavrovouni në Skydra”.
Disa orë pas aksidentit, mediat greke, duke cituar policinë, raportuan se deri më tani janë identifikuar katër persona të cilët janë të moshës 55, 50, 19 dhe 16 vjeç, të gjithë shtetas shqiptarë.
