Për kryetarin e PD-së Sali Berisha, koka e inceneratorëve është kryeministri Edi Rama dhe Sekretari i Përgjithshëm, Ëngjëll Agaçi. Në “Syri tv”, Berisha ka dhënë argumentat se një shkresë zyrtare kërkon tre javë kohë për tu analizuar dhe të kthehet përgjigje, ndërsa Edi Rama dhe Ëngjëll Agaçi kanë firmosur 17 shkresa për 24 orë.
“Një herë dhe njëmijë herë po ta analizosh të dalin këto gjëra që Zoto dhe Mërtiri janë dy ish socialistë, që kurrë nuk mund të shpallnin emergjencën kombëtare të plehut. Nuk mundnin kurrë që ti impononin qeverisë shqiptare të shkelmonte projektin e landfilleve të sponsorizuar nga BE-ja. Ata nuk mundin kurrë që të bënin një mbledhje me 12 zv.ministra, por kush mundej tjetër përveç Ramës për shpalljen e emergjencës kombëtare për mbetjet, në këtë mbledhje kanë votuar 9 persona kundër.
Do të silleshin mbetjet nga Italia dhe do të digjeshin me 100 euro tonin. Kush ka plehrat, kap miliardat apo në zhargonin e mafias plehrat janë floriri i qytetit, pra janë Zoto, Mërtiri, zotërit e plehrave, apo janë të tjerë. Çfarë pushteti ka Zoto për të firmosur 17 shkresa në 24 orë, kur një shkresë do tre javë në kanalin qeveritar. Këtë pushtet e kishte vetëm Ëngjëll Agaçi dhe Edi Rama” – deklaroi Berisha.
