Kryetari i Partisë Demokratike, Sali Berisha foli këtë të enjte, mbi urdhër-arrestin e lëshuar nga SPAK, për ish-zëvendëskryeministrin Arben Ahmetaj, dhe largimin e këtij të fundit nga Shqipëria.
Gjatë fjalës së tij në mbledhjen e grupit të PD-së, Berisha u shpreh se ish-zv.kryeministri u largua nga Kakavija, ndërsa ngriti dyshime se po negocion me Ramën.
“Ngjarje e jashtëzakonshme arratisja e Ahmetajt. Arratiset njeriu që nga viti 2013 për të paktën 8-9 vite ishte superministri. Arratisja e tij tregon moralin e kësaj bande që është në pushtet. Akuzat e bëra publike mendoj se janë të drejta. Por ajo është treguar e kursyer (SPAK). E kursyer e them këtu sepse Ahmetaj, pas Ramës dhe Agaçit. Ahmetaj ia mbathi, por ishte vetë Rama e çoi vetë në azil. Në pamje të parë duket paradoks, pasi edhe i hapi dosjen dhe kërkoi arrestim, por më pas e çoi në azil. E çoi në azil, pasi Ahmetaj, në çdo pyetje publike, do të thoshte; pyesni Edi Ramën. 4 orë para se shkresa të dilte nga Prokuroria u informua Ahmetaj dhe u gjet në Kakavijë dhe u vërsul atij. Preu biletë për në Itali, për të dezinformuar dhe ia mbathi në Kakavijë. Thuhet se po negocion me Ramën”, tha Berisha.
Më tej, Berisha shtoi se arratisja e tij i ka dhënë një goditje të tmerrshme kësaj organizate kriminale, ndërsa theksoi se duhet të mblidhen firmat për të kërkuar mocion me debat me kreun e qeverisë Edi Rama në lidhje me këtë çështje.
Berisha u shpreh kundër vendimit të socialistëve për të shtyrë votimin në parlament për miratimin e kërkesës së prokurorisë për arrestimin e Ahmetajt.
“Arratisja e tij i ka dhënë një goditje të tmerrshme kësaj organizate kriminale dhe dj në qoftë se e kontstatuat avokatët e tij të cilët dihen lidhjet e tyre me partinë mëmë, thanë se ka një hall familjar. Me Ramën po negociohet rikthimi i tij nëse Rama i plotëson kushtet. Përgëzoj deputetët e opozitës që kanë votuar dje. Por çfarë nevoje kishte që të shtyhej. Socialistët me urdhër të Ramës kërkuan shtyrje për t’i dhënë kohë negociatave me Ahmetajn. Këto janë histori krimi dhe turpi. Rama duhet të thirret me urgjencë në mocion me debat në parlament për të dhënë llogari për veprimtarinë e organizatës kriminale që drejton”, deklaroi Berisha.
Një ditë më parë Berisha deklaroi se Ahmetaj është njoftuar për kërkesën e prokurorisë dhe është larguar nga vendi për të shmangur përballjen me akuzat në vend. Nisur edhe nga fakti që Ahmetaj është larguar nga Shqipëria mesditën e të premtes më 7 korrik, në të njëjtën ditë që është firmosur edhe kërkesa e SPAK drejtuar Kuvendit për autorizim për arrestimin e tij nën tre akuza: për pastrim parash, deklarim të rremë e fshehje pasurie dhe korrupsion pasiv.
